*Indwi ya 28 yo mu mwaka : ku wa gatatu* _(Années paires)_

*IGISOMWA CA MBERE*

*Ivyo dusoma mw’Ikete Umutumwa Pawulo yandikiye Abanyagalati* (5, 18-25)

Ncuti zanje,

Nimwaba muyoborwa na Mutima, ntimuganzwa n’Ibwirizwa. Aho nyene, nta wuyobewe ibikorwa vya kamere y’umuntu: ni ubusambanyi, ibiterasoni, ubuhumbu, ugusenga ibigereranyo, uburozi, urwanko, umuryano, ishari, ishavu, impari, amatati, amacakubiri, igono, ukuborerwa, ukurenza ingero mu mfungurwa be n’ibindi ben’ivyo: kandi ndasubiye kubibaburira nka kera, ko abakora ben’ivyo bikorwa batazotorana Ubwami bw’Imana. Na vyo ibiva kuri Mutima ni urukundo, akanyamuneza, amahoro, ukwiyumanganya, ubukundanyi, ubuntu, ukugumya umutima, ugutekereza c’ukwitsinda: ben’ivyo, nta tegeko ribibuza. None rero, aba Kristu Yezu barabamvye kamere yabo hamwe n’ingeso mbi zayo n’ivyipfuzo vyayo. Ko tubeshwaho na Mutima, nituyoborwe rero na Mutima.

*IZABURI 1, 1 ac.2, 3, 4.6a*

Icit.: *Uwugukurikira, Mukama, azoronka umuco w’ubuzima.*

Hahiriwe umuntu ataja ku mohe y’abahemu,

agahimbarwa n’amabwirizwa y’Umukama,

akama ayazirikana uko bukeye uko bwije.

Asa n’igiti catewe mu kinyotera,

hageze cama ivyamwa bihimbaye,

amashami yaco ntiyigera ahundagara.

Abahemu bo si uko, haba namba,

eka bameze nk’umuguruka utumukanwa n’umuvaga;

ariko inzira y’aberanda izwi n’Umukama.

*INKURU NZIZA*

*Aleluya, aleluya*

*_Ijambo ryawe, Mukama, ni ryo kuri; muri uko kuri, n’utugire beranda._*

*Aleluya.*

*Ivyo dusoma mu Nkuru nziza ya Yezu Kristu nk’uko yashikirijwe na Luka* (11, 42-46)

*Muri irya misi, Yezu yavuze ati: «Muragowe, mwa Bafarizayo, kuko mushikana ituro ry’imenta n’iry’isogi be n’iry’imboga zose, mukareka ubutungane n’urukundo rw’Imana! Ivyo ni vyo mutegerezwa kugira, mutaretse ibindi. Muragowe, mwa Bafarizayo, kuko mukunda ibibanza vy’imbere mu masinagoga n’indamutso ku nama! Muragowe kuko musa n’imva zitaboneka! Na bo abantu bakazicako batabizi.»*

*Araheza umwe mu bahinga b’amategeko amwishura ati: «Mwigisha, mu kuvuga utyo, na twebwe nyene uradutuka!» Yezu aramwishura ati : «Muragowe namwe bahinga b’amategeko, kuko muzigira abantu ku muzigo badashobora gutwara, namwe ntimuyikozeko n’urutoke!»*

https://ryotwubaka.com/2016/09/18/indwi-ya-28-yo-mu-mwaka-ku-wa-gatatu-annees-paires/