ITANGAZO RY’UMUHARI ABISEZERANO RYO KUWA 10/04/2017

Ibiro bikuru vy’umuhari w’Abisezerano vyarakoranye mu nama yavyo yo kuri uyu wa 6 na 7/4/2017 muntumbero yo kwiga urwandiko no 003 SG/04/04/17 rwo kuwa 04 Ndamukiza 2017 rwashikirijwe n’uwahora ari umunyamabanga mukuru w’umuhari Bonheur Mutabazi, mbere akanarukwiragiza mu banyamuhari.
*Abagize ibiro bikuru vy’umuhari abisezerano bamaze guca irya n’ino ivyashikirijwe muri urwo rwandiko ningene vyashikirijwe;

*Abagize Ibiro Bikuru vy’Umuhari Abisezerano baragerageje guha akaryo ko gusigura no gutanga ivyezo vyivyo banditse;
*Abagize ibiro bikuru vy’umuhari abisezerano bishimikije ingingo zigenga umuhari abisezerano Iya 9 iraba inzego z’umuhari; iya 22 iraba kumenya ibikorwa vyumunyamabanga mukuru; iya 23 iraba ibikorwa vy’umukuru w’umuhari; n’iya 55 iraba guhana uwarenze amategeko ;
Abagize Ibiro Bikuru vy’Umuhari Abisezerano babonye ibi bikurikira :
– Bonheur Mutabazi yanditse urwo rwandiko yarabesheye ibiro bikuru vy’ingabo z’abisezerano kuko zitigeze zimutuma urwo rwandiko benshi bakaba baguye mugahundwe barwumvise;
– Bonheur Mutabazi yasutswe n’agatima kamaronko no guhahamira ivyicaro maze ata intumbero mu kwandika urwo rwandiko ata muntu numwe wo mu biro bikuru agishije inama;
-Abagize ibiro Bikuru vy’Umuhari Abisezerano basanze amajambo yavuze ari ibinyoma, gucafuza inzego n’indongozi no gucanishamwo abanyamuhari yishimikije amabanga yashinzwe. Kubera izo mvo zose tudondaguye ingingo yafashe yo kwihagira ubutegetsi ku karimi ni impfagusa.
*Ibiro bikuru vy’Umuhari abisezerano vyafashe ngingo zikurikira:
–Ingingo ya 1: Uwahora ari umunyamabanga mukuru w’umuhari Bonheur Mutabazi arahagaritswe muri ayo mabanga n’abo boba bafadikanije kwandika urwo rwete barahagaritswe mumabanga.
– Ingingo ya 2: Uwahora ari umunyamabanga mukuru w’umuhari n’abo bafadikanije kwandika urwo rwete barahagaritswe mumuhari vyagateganyo mukiringo c’amezi atandatu.
– Ingingo ya 3: Nyakubahwa Dr. Merlin Dusengumuremyi arongoye umuhari asabwe gusubiriza mumaguru masha abo bahagaritswe.
– Ingingo ya 4: Abanyamuhari bose mubisata vyose basabwe kubandanya imirimo yabo no kwima amatwi ababasamaza kuko mu nzego z’isezerano nta gkwihagira uburongozi kugikenye canke kukarimi bishoboka. Murakoze!

Ni dusangwe Imana Uburundi n’Isezerano.

Bigiriwe I Bujumbura igenekerezo rya 10/4/2017.
Kubwo ibiro bikuru vy’abisezerano