Bujumbura : Amashuri 6 yahagaritswe kuva mu ntango z’umwaka w’ishuri 2017-2018 
Nk’uko biri mw’itangazo ry’ubushikiranganji bw’indero, amashuri y’intango ayisumbuye n’inyigisho za kaminuza, ryateweko umukono n’umushikiranganji Janviere NDIRAHISHA, ayo mashuri yose yatanguye gutanga inyigisho z’ishuri nshingiro ata burenganzira yahawe n’ubushikiranganji.

Ayo mashuri ni Ecole primaire de la chance de Kanyosha (EPCK), Ecole Baptiste de l’Afrique Centrale riri muri zone ya Buterere, Le buisson ardent ryo muri zone ya Kinama, Ecole King school Center iri muri komine ya Cibitoki, Ecole Notre Dame de la Tendresse iri muri komine ya Cibitoki, hamwe na Ecole le Soleil de demain iri muri zone ya Kamenge.

Muri iryo tangazo, ubushikiranganji bw’amashuri y’intango ayisumbuye n’inyigisho za kaminuza busaba abavyeyi b’abana bahora biga kuri ayo mashuri kubaronderera ibibanza ahandi.

Ubushikiranganji bw’amashuri y’intango ayisumbuye n’inyigisho za kaminuza buheruka kandi kugabisha abayobozi b’amashuri atashikanye ibice 30 kw’ijana mu kibazo ca Reta ko bashobora gukurwa mu kazi.