Kuva kur’uno wa kane igenekerezo rya 1 Ruhuhuma, ihinguriro ry’ibinyobwa BRARUDI rihingura ryadugije igiciro c’inzoga yo mu bwoko bwa Primus. Inzoga iri mw’icupa rya santiritiro 72 ryavuye ku mafaranga 1400 y’amarundi rija ku mafaranga 1500 y’amarundi.

Nk’uko biri mw’itangazo ry’ihinguriro BRARUDI , bisunze ko ibikoresho vya nkenerwa vyaduze ibiciro kw’isoko,iduzwa ry’ibiciro vy’ibitoro n’umuyagankuba, arivyo vyatumye bongera amafaranga ijana y’amarundi ku giciro c’inzoga ya Primus cari kihasanzwe.

Iryo tangazo rimenyesha ariko ko, ku zindi nzoga zihingurwa n’ihinguriro BRARUDI batadugije ibiciro.

Muri iryo tangazo ryateweko umukono n’umuyobozi ajejwe ubudandaji,ihinguriro BRARUDI rimenyesha ko iyo ngingo izofasha kwongereza ico kinyobwa mu bubiko, no kworosha itangwa ryaco ku bagifata.

Iyo ngingo itangura kuja mu ngiro kur’uyu wa kane, igenekerezo rya 1 Ruhuhuma 2018.