Sentare ntahinyuzwa imenyesha ko yafashe ingingo zikomeye kugira izohane ivyaha vyoshobora gukorwa mu gihe c’amatora yo kwemeza canke guhakana ibwirizwa shingiro yimirije mu kwezi kwa Rusama.

Mw’itangazo ryasohowe na Sentare ntahinyuzwa kw’igenekerezo rya 24 Ndamukiza 2018, Agnes BANGIRICENGE umuvugizi w’iyo Sentare yasavye abashikirizamanza hamwe n’abacamanza kwama bagavye kugira bazokurikirane inkozi z’ikibi zoshobora gukora ivyaha. Mu gihe ivyaha vyokorwa, imanza zizocibwe ikibiriraho nk’uko bitegekanijwe n’amategeko.

Muri ryo tangazo, Agnes BANGIRICENGE asaba abatwara amaparake hamwe n’amasentare gutegura abakozi bakwiye kugira ntihagire inkozi yikibi yobaca mu ryahumye mu gihe c’ayo matora yimirije.

Iryo tangazo rirangiza risaba abanyagihugu hamwe n’abarongoye imigambwe kwirinda gukora ivyaha bisanzwe canke bijanye n’amatora, kuko mu gihe vyokorwa inzego zibijejwe zizobahana hisunzwe amategeko.