Kayanza: Hari ubusuma bw’ivyuma bivugwa ko bumaze iminsi bwibonekeza ku mashure yo muri komine y’indero ya Kayanza. Bamwe mu bayobozi bamenyesha ko, mu kiringo kitarenza amezi 2, kw’ishure shingiro rya Karinzi hibwe amadirisha 8 y’ivyuma. Kw’ishure ryisumbuye rya Cukiro naho haharurwa amadirisha 12. Kw’ishure shingiro rya Kirema ho n’igiti camanikwako ibendera caribwe nk’uko bivugwa n’umuyobozi waryo.

Siméon Tuyubahe agira ati : « Abo basuma barondera ibintu vy’ivyuma. Bahereye ku cuma baminikako idarapo, hanyuma batwara ikonteri y’amazi n’ayandi ma tuyaux y’ivyuma. Baratwaye kandi ivyuma vy’intebe n’ama_bloc ciments bamenaguye baronderamwo ama_fer à béton, arya magufuri aremereye manini manini barayatwaye. Inyundo twakoresha nk’intebe zigize ikibazo barazitwaye, barasambuye ingoma twavuza aha kw’idarapo baronderamwo irya ngunguru. »

Abayobozi b’ayo mashure bibaza ko abiba ivyo vyuma baja kubigurisha ku munzane. Bamenyesha ko ikiro c’ivyuma kigurwa amafaranga ari hagati y’ibihumbi bibiri n’ibihumbi bitatu, bivanye n’ubwoko bwavyo n’urugero bigezeko mu gusaza. Mu ntango z’uku kwezi, buramatari w’intara ya Kayanza yasavye ba musitanteri guhagarika urudandazwa rw’ivyo vyuma mu makomine yose. Rémy Cishahayo yasiguye ko basanze ivyuma vya reta bigeramiwe n’ababishora.