Bururi: Ubukene bw’imbuto zirobanuye z’ibiharage buravugwa muri kino gihe irima ry’impeshi ryatanguye. Abarimyi bamenyesha ko bariko bararima ariko ata mbuto nziza bafise. Basaba abajejwe uburimyi mu ntara kubaronderera izo mbuto.

Umuyobozi ajejwe uburimyi n’ubworozi muri iyo ntara aremeza ko ubwo bukene bw’imbuto buriho. Gloriose Niyubahwe asigura ko bwatumwe n’uko i Bururi bijukiye cane kugwiza imbuto z’ibiraya n’ibigori.

Uwo arongoye ibiro bijejwe uburimyi ahamagarira abagwizambuto bo mu zindi ntara, boba bafise imbuto zirobanuye z’ibiharage, kuzishorera i Bururi abarimyi bazigure.