Furura iyo ngabire wahawe kugira ngo iheshe icubahiro Uhoraho Imana.

WAME WIBUKA KURI UWEJEJWE N’AMARASO Y’IGICIRO YA YESU KRISTO UMUCO WAWE UGARAGARE.

Abantu benshi barumva ubutumwa bgiza bg’umusaraba bukabacumita mu mitima, bakizera, bakihana bakezwa bakanabatizwa ariko iyo bahuye n’ibibagerageza bagasubira inyuma bakarwa. Kenshi ibibarwisha biza iyo bari, bonyene umubiri n’ivyiyumviro bikabibutsa ibihimbaro bidafashe vy’iy’isi ahandi ababanyi, abagenzi n’ivyo bisangamwo bikabatwara akayombekere. Hariho n’inyigisho z’amadini n’amashengero zizirura ibizira mbere ugasanga hariho n’imirwi y’abantu iziririza ibiziruye mw’ijambo ry’Imana. Ivyo vyose bigatuma hari abantu babura ico bafata n’ico bareka.
Ariko weho, wumire kuco wahawe. Ijambo ry’Imana ryanditse muri Bibiliya Yera n’ijambo ry’ukuri Mpwemu Yera ahishura kandi ashingira intahe. Ntube we nyene ngo wigendeko satani ameze ntintambge igenda irivuga yokurotsa. [1Petero 5:8] Kandi ntiwisuke mu madini n’amashengero kuko menshi ameze nk’imva zikuyengeje umwura kandi imbere haraboze huzuye amagufa gusa kuko buzuye uburyarya, ukwiyorobeka n’ubunyavyaha.[Matayo 23:27-29] Fata umwanya wo gusenga nti wihute kugira ngo usiguze Imana maze Mpwemu Yera akwerekeze aho ukwiriye kuja kuruhukira muri Yesu Kristo. [Abaroma 18:14]

  • Uzoheza wumve Indirimbo zawe z’amashimwe zidudubiza mu mutima wawe.
  • Uzoheza wumve ushaka gushingira intahe Umwami n’Umukiza Yesu Kristo.
  • Uzoheza wumve ijambo ry’Imana ryuzuye muri wewe.
  • Uzoheza wumve Imburi n’ubuhanuzi vyubaka Ishengero rya Kristo Yesu.
  • Uzoheze wumve uguma ugira ihishurirwa rishasha ku bugingo bgawe, ku muryango wawe n’ukubaho kwawe.
  • Uzoheza wumve yuko ufise ishaka ryo kuja kurondera abazimiye no kuvuga ubutumwa mu mahanga.
  • Ivyakubera inyungu kera bizokubera igihomba n’ibisesema, kandi ukwo niko kubohoka. [Abifilipi 3:7]
    Itara ariyo ngabire yawe ntikubikweko igiseke kandi ukwizera kwawe ntikugapfe impfagusa. Korera Uhoraho Imana yawe mu kugororoka hakibona kandi ugifise inkomezi. [Matayo 5:15] Ingo wimenyereze,ukomezwe kandi uvugurirwe kuko ibihe vyo gutwara ivugururwa, umuvyuro n’ikanguro kw’isi biriko biregereza. Umwami n’Umukiza Yesu Kristo Yamamare!

Dusengere abitwa abakozi b’Imana b’Abarundi kuko bakora ivyaha n’abapagani batinya.

UMUKRISTO WESE ASABGA GUSENGERA ABITWA ABAKOZI B’IMANA B’ABARUNDI KUGIRA NGO IMANA ITABARE ABIZERA BAYO.

Uko imico myinza y’ubuntu, urupfasoni no kwiyubaha mu gihugu yagiye ironinekara ni nako agakiza k’abantu bari mu mashengero kagiye karahera. Aha ntaworinda kuvuga ivyaha n’ububisha bikorwa n’abantu mu gihugu kuko birateye isoni n’agahinda. Ikibabaje gusumba vyose n’uko ishengero ariryo ryari rikwiriye kuha akarorero keza abataramenya Kristo Yesu bari mu gihugu niryo ryacitse iyororero ry’ivyaha. Haribonekeza abungere b’intama z’Imana mu ba padiri n’aba pasitori biha gusambanya abo bari bajejwe kurera, kwica ibibondo, kwica abavyeyi, kugurisha ibivi ngo batange ibiturire n’ibindi vyaha n’abapagani bataramenya Imana bakora badegedwa. Hari intambara hirya no hino mu madini n’amashebgero zigamije gusambura imitima y’abizera Imana.
Twese dusengere abavuga yuko ari abakozi b’Imana kuko benshi bakorera satani bakoresheje ibinyoma vyambaye ubusa. No mw’Ishengero rya Yesu Kristo-Ihanga Ryera ry’Imana hari abo twagomvye gukorana imirimo y’Imana dusanga bafise ya mpwemu iri mw’isi maze ntitwabandanya. Abo bamaze gusezererwa baragerageje gutesha ubgoko bg’Imana umugambi w’ukwihana, ukwezwa no guteramira amasezerano mu gukwiragiza ibi binyoma mu bantu:

  • Ngo Ishengero rya Yesu Kristo Ihanga Ryera ry’Imana ryarasambutse nta muntu n’umwe arisigayemwo mugihe ryashinze imizi mu ntara zose z’igihugu no mu makungu.
  • Ngo Ishengero rya Yesu Kristo-Ihanga Ryera ry’Imana, leta ikoresheje iperereza n’igipolisi barabatse uruhusha rubemerera gukora ku mugararagaro mugihe dushinguye neza Ordonnance Ministérielle ukuri kwamye. Barabesha biteye ubgoba.
  • Ngo Ishengero rya Yesu Kristo-Ihanga ry’Imana rigizwe n’abantu batambikije mu bizira vy’amadini ngo abo nibo bagiye kwambuka. Haba namba turi abatoranijwe n’Imana ntitwivanga kuko turi IHANGA RYERA.
  • Ngo Abakozi b’Ishengero rya Yesu Kristo – Ihanga Ryera ry’Imana bamwe bambaye impeta z’aba Freemasoni ngo abandi nabo bakoze ivyaha bituma badakandagira mu gihugu cacu. Satani ntagira isoni zo kwibeshera. Twese dushika hose kuko ntaco dupfa n’umuntu n’umwe mu gihugu no kw’isi yose atari uguhamana n’icaha.
    Hari abantu baduka bakavuga ibintu nk’ivyo abadakwije neza mu mutwe kandi bakenyaguza: Utujambo tw’ubupfu tuvugwa n’abapfu nyene. Ni ukubasengera Imana izobiyereke canke ubugombe bgayo bube kuri bo. Ntihakagire uwa Kristo n’umwe aja ku binyoma n’amohe ya satani n’ibikoresho vyiwe. Satani ntabasamaze ngo abateshe intumbero n’umuhamagaro kuko tugiye kwambuka. Ishengero rya Yesu Kristo-Ihanga Ryera ry’Imana rigendera ku rutonde rw’ijuru, ryitondera ivyagezwe vyose Uhoraho Imana aduha kandi nyene Ishengero ntanyiganyizwa. Rifise vyangombga vyo mw’ijuru n’ivyo mu gihugu, abakora muriryo barihanye barezwa kandi ntiryifatanya n’ibihumanya canke abagomba kurihumanya. Ni Ishengero ry’abera. Hari umwe canke babiri bokora ibinyuranye n’urutonde rw’Imana twobahanura tukabakosora banse tukabasezerera nkuko twabikoreye abandi kuko ntituzokwambuka turi ikivange canke igugu ry’abantu. Ukuja mw’ijuru si urufatanamende ni umuntu wese n’ikimenyetso yahawe n’Imana Ihoraho. Dusengere abitwa abakozi b’Imana bose bari mu gihugu cacu c’Uburundi.
    Umwami n’umukiza wacu Yesu Kristo yamamare!

“Uwashikanye benshi ku bugororotsi azokwakaka nk’inyenyeri ibihe bidashira” Daniyeli 22:3

UHORAHO IMANA AZOKUBAZA ABO WASHIKANYE KU GAKIZA UKO BANGANA.

Abantu benshi barakunda kwitwa abakozi b’Imana: Abungere bakiha n’amazina y’ivyubahiro, abavugishwa, abasenzi, abavugabutumwa, abasemerezi, … mbere bamwe barashiramwo n’inkomezi nyinshi mu kwigisha, kuduga imisozi, kuja hirya no hino bashiramwo ishaka rinini.
Ivyo sivyo binyiganyiza umutima w’Imana kuri benshi kuko abatari bake babikora kugira ngo bamenyekane, bironkere ivyubahiro abandi bakabikora kuko bafise izindi nyungu bakuramwo zishimisha imitima yabo n’amaronko. Mw’ijuru ntituzobazwa amajambo y’Imana twavuze uko angana, ntituzobazwa imburi n’ubuhanuzi twavuze uko zingana, ntituzobazwa ibisagara n’amashengero twagendeye uko angana canke imisozi twaduze uko yari imeze. Ivyo vyose urashobora kubikora ntihagire umusaruro uvyarira Umwami n’Umukiza wacu Yesu Kristo kuko ubikora mu bgibone, ubgishime canke mukurondera inyungu zawe zo mu mutima no mu mufuko.
Ukwitanga nyakuri ni igihe ivyo ukora vyose ubikora kugira ngo ushikane uwazimiye kugagiza ngo nawe ashike ku kugororoka. Mw’ijuru bazoharura bangahe umukozi w’Imana yashikanye ku kugororoka gushitse. Biragomba yuko ukorerara Imana ukurikirana abo ubira ubutumwa umuntu ku wundi kuva yumva ubutumwa akizera, guca ku kwihana ivyaha n’ukwezwa, ukubatizwa n’ukwuzuzwa Mpwemu Yera maze akaramiriza mu nzira y’agakiza. Iyo udakurikiye iyo nzira usa n’uriko uravomera ikibira nk’imvura irwa mw’ishamba.
Daniyeli yareretswe abashikanye benshi ku kugororoka ingene bazomera, aca agira ati: “Abagize ubgenge bazokayangana nk’ugukayangana kwo mw’itazanure ry’ijuru, abashikanye benshi kubugororotsi bazokwaka nk’inyenyeri ibihe bidashira” [Daniyeli 12:3]
Kenshi hariho ababgira ubutumwa abantu ku mihora, za whatsapp, facebook mbere bakaja gusemerera mu masoko n’ahandi bagaca bitambukira. Ni vyiza kuko baba bahejeje umwuga kandi benshi baraburirwa mugabo siyo nzira yo gushikana abantu ku bugororotsi. Iyo nzira imeze nko kugira umurima kuko uramena umushike, ukarima, ugateragira, ukavomera, ugapompa umuti, ukabagara,… gushika habe isarura. Ivyo utabikoze usa n’uwimijagiye imbuto mw’ishamba.

Ugusengera abana bato no gusengera ingo ni umugirwa ukwiriye gukomezwa no gushimira Imana

UGUSENGA NO GUSENGERA ABIZERA NI IKIGORWA C’ISHENGERO RYA YESU KRISTO- IHANGA RYERA RY’IMANA KW’ISI YOSE.

Nkuko Umwami n’Umukiza wacu Yesu Kristo yabidutegetse, dukwira amahanga yose twamamaza ugucungurwa kw’abaremwe bose n’inkomezi ziri mu maraso y’Umucunguzi Yesu Kristo mu gukiza ingwara, kubohora ababoshwe mu buryo bgose no gutanga amahoro aruta uko yomenywa n’uwariwe wese. [Ab’Ifilipi 4:6]
Mu gushitsa ivyo twatumye gukora turabgira ubutumwa abaremwe bose, abizeye bakihana ivyaha vyabo vyose, bakabatizwa mw’izina rya Yesu Kristo, bakuzuzwa Mpwemu Yera kandi n’abo bagakora imirimo y’Imana. Uretse kubatiza, gusengera abarwaye n’iyindi mitwaro, hariho guhezagira abubakanye, gushingura imibiri y’abatashe, kugendera abagowe, gufasha aba na bariya n’ibindi. Mu basengerwa hariho ababa bafise imitwaro itandukanye mugabo hariho n’ababa baherezwa Uhoraho Imana nk’abana bato n’abandi baba bashimirwa Uhoraho Imana nk’abamaze imyaka ishimishije bubakanye ru-Kristo.
Kuri iri genekerezo rya 06/11/2021, Ishengero rya Yesu Kristo- Ihanga Ryera ry’Imana ryari ryaramutse risengera beneData bamaze imyaka 18 bubatse ru-Kristo. Bari mu gihugu ca Australia iyo twabasanze turabakeza kandi turabasengera tubashimira Imana mw’Izina rya Yesu Kristo. Twaharonkeye akaryo ko guha impanuro abubakanye bose kugira ngo ingo zabo zibe ibicaniro vy’amasengesho bizima kandi zibe isoko y’amahoro.
Umwami Yesu Kristo yamamare!

Imburi n’ubuhanuzi: Imana Ihoraho igiye gushitsa isezerano.

IMBURI N’UBUHANUZI: IGIHE KIRARANGIYE IRYAVUZWE RIGIRA RITAHE 05/11/21

Twariko turasenga ku bicaniro vy’Ishengero rya Yesu Kristo-Ihanga Ryera ry’Imana nkuko bisanzwe. Murazi yuko ijuru ryadutondekeye kuba ku bicaniro iminsi yose kugira ngo ducurirwe amabanga yo mu bihe bigoye bigiye gushika. Tugisenga hururutse ijwi ry’Uhoraho Imana rituragara nk’umuturagaro. Naciye nfata ikaramu n’ikaye nandikamwo inzozi, inyereko n’ubuvugishwa maze nandika ingingo 10 iryo jwi ry’Uhoraho Imana rya dushikirije.
Bangenzi ijwi rya Mpwemu Yera hari aho riza ryongorera mugabo haraho ijwi r’Imana riza riteye ubgoba uwuryumvise agahinda agashitsi. Iryo jwi ryavuze yuko twobgira abantu bose ngo:

  1. Imana iratabaye igihugu kandi hari ikimenyetso abantu bagiye kubona. Umugambi wayo ni ugutabara abayizera, bihanye kandi bejejwe.
  2. Hari intambara z’abavukana zigiye gutangura abantu bose babibone. Abafise amatwi yo kwumva ni bumve.
  3. Imana irihagurukiye ntawuyihagarika kuko yirahiye gushitsa ico yasezeranye [Zefaniya 3 :11-12 & Zekariya 4 : 6-9]
  4. Imvura itanguye guhinda iba igira irwe. Hagiye kurwa isegenya kandi ababi n’abeza bagiye kuyibona.
  5. Utugamye imvura mw’Ihema ry’Imana, ibiti n’amazu bizogururwa n’igihuhusi bizomuhitana. Ubu nico gihe co kuja mu bgugamo kuko irashitse iriko irasuma.
  6. Uwuri kure ni yegere kuko igihe nti kiri kure kuko iyi ni imburi ku bantu bose ngo binjire mw’ihema ry’Imana.
  7. Abari mu mashengero benshi bazotangara kuko umuntu wese namuhaye isaha yo kumenya igihe n’amaso yo kubona. Naratanze umwanya ukwiriye w’imburi n’abasemerezi nahagurukije bashitse hose.
  8. Imana iti: « Ngiye gukora ikintu gihambaye kandi abantu bose bazobona yuko ari jewe ndabikoze mu gihugu no mw’ishengero kuko ngiye guhindura ibintu nkoresheje ukuboko kwanje kw’inkomezi. »
  9. Uhoraho Imana ati: “Umuntu wese mu bizeye abo natumye maze akaba mu gitigiri c’abihanye ndamuhaye umutaka w’uburinzi n’uwuzoba ari mu murima nzohamurindira. Ukumva ivyo bibaye ntuzogire uwo uhamagara canke uwo uja kuraba, uzokwugare ugume ku gicaniro cawe niho nzokuzigamira.”
  10. Imana iti:” Musome bgoko bganje amajambo ari muri [2 Ingoma 20 :2-19 na Yeremiya 38 :6-20] kugira ngo mwese mumenye ingene nkora jewe Uhoraho Imana yanyu.”
    Uwizera wese asabga kwisomera aya majambo dusanga muri Bibiliya Yera kugira ngo atahuzwe na Mpwemu w’Uhoraho ingene bigeye kugenda mu buzima.
    Umwami wacu Yesu Kristo Yamamare!

Mwibuke kwumva no gukora nico cerekana abana b’Imana.

IVYAVUYE KU MUSOZI W’AMASENGESHO 01/11/2021.

Umusi wo kugaruka kw’Umwami wacu [Malaki 4:4]
1.Ehe raba, umusi uraje, waka nk’itanure; abibone bose n’inkozi z’ibibi zose bazoba ibishingwe; kand’ uwo musi ugira uze uzobatongora, ni k’Uhoraho Nyen’ ingabo agize, nta n’agashitsi cank’ agashami uzobasigarana. 2. Ariko mweho abubaha izina ryanje izuba ry’ ubugororotsi rizobarasira, rifise ugukiza mu mababa yaryo. Maze muzosohoka mukina amatavu nk’inyana zivuye mu ruhongore.
3 Kandi muzosiribanga abanyakibi; bazoba umunyota musi y’ibirenge vyanyu ku musi nzoshinga, ni k’Uhoraho Nyen’ ingabo agize. 4 Ni mwibuke ivyagezwe vy’umusavyi wanje Mose, amabgirizwa n’ivyashinzwe, ivyo namugereye i Horebu kuba ivyo kuganza Abisirayeli bose.
Twariko turasenga ku gicaniro c’Ishengero rya Yesu Kristo-Ihanga Ryera ry’Imana nk’uko bisanzwe. Tukiriko turatazirisha n’indirimbo, tuvuza ingoma, ipendo kandi
dukoma amashi amashi, ababishoboye barahagurutse baratambira Uhoraho Imana yacu mw’izina ry’ubushobozi rya Yesu Kristo. Hagati y’indirimbo n’iyindi,
habaye agacerere tutari twiteze aho Uhoraho Imana yururutse avugana natwe aciye mu musavyi wayo ati: “Ni mwumve, ni mwumve nd’Uhoraho Imana yanyu,
Imana ya Aburahamu, Yakobo, Mose, Yoshuwa na Dawidi. Nd’Uhoraho Imana
y’Ihanga Ryera nitoranirije I Burundi. Nje kuvgana namwe ibi bikurikira:

  • Ingoma ya Yesu Kristo yaramaze gushingwa muri iki gihugu c’Uburundi
    kandi ni ntabanduka. Mwese mwitegurira kuyamamaza.
  • Ni mwame mwejeje kandi mu tunganye ingeso zanyu kuko ngira
    ndabajabukane Yorodani ndabahe igihugu nabasezeraniye.
  • Ni mwitandukanye n’imigambge, amadini n’amoko kuko ngomba yuko muba inyegu yanje yo mw’ishamvu yanje, jewe Uhoraho.
  • Uwanka kwumvira amajambo ndababgira ntazoshika mu gihugu nabasezeraniye kuko ata kivange mw’Ihanga ryanje jewe Uhoraho.
  • Ni mwongere musome kandi musomere ubgoko bganje amajambo yanditse muri [Malaki 4:1-4] no muri [Yeremiya 7:1- 15].
    Tumaze gusoma no kwumva ayo majambo, naho twari dusanzwe tuyamenyereye twarahinze agashitsi maze umwe wese atangura kwisuzuma
    yuko adatambikije mu kintu na kimwe kandi yuko yubahirije ibintu vyose Uhoraho Imana yadutegetse kimwe ku kindi kuko igihe kiratujanye.
    Imana yongera kwinginga abantu ngo bihane [Yeremiya 7:1-15]
    1 Ijambo rivuye k’Uhoraho riza kuri Yeremiya, 2 riti Hagarara mu kirimba kirora ku ngoro y’Uhoraho, uhatangarize iri jambo, uti Ni mwumve ijambo ry’Uhoraho, mwebge mwese b’i Buyuda, abaca mur’ ibi birimba ngo musenge Uhoraho.
    3 Uku ni k’Uhoraho Nyen’ ingabo agize, ni we Mana y’Abisirayeli, ati Mutunganye ingeso zanyu n’ibikorwa vyanyu, nanje nzobabesha aha hantu. 4 Ntimwizigire amagambo y’ibinyoma, avuga ngo Nguru urusengero rw’Uhoraho, nguru urusengero rw’Uhoraho, nguru urusengero rw’Uhoraho!
    5 Erega ni mwatunganya ingeso zanyu n’ibikorwa vyanyu, ni mwaca imanza ziri hagati y’umuntu na mugenzi we, 6 ni mudahahaza ingenzi cank’ impfuvyi cank’ umupfakazi, ntimuvishirize amaraso y’utacumuye aha hantu, ntimugendanire izindi mana, bikababera icago: 7 nuko nanje nzobabesha aha hantu, mu gihugu nahaye ba sogokuruza, uhereye ubga mbere ugashitsa ibihe bidashira.
    8 Mbega ko mwizigiye amagambo y’ibinyoma adafise ikimazi! 9 Mbega birashoboka ko mwiba, mukica, mugasambana, mukarahira ibinyoma, mukosereza Bayali imibavu, mukagendanira izindi mana mutigeze kumenya, 10 maze mukaza mugahagarara imbere yanje mur’ iyi ngoro yitirirwa izina ryanje, mukavuga, muti Turakijijwe: mwaheza mugakora ivyo bizira vyose?
    11 Non’ iyi ngoro yitirirwa izina ryanje, mbeg’ ihindutse nk’isenga ry’abambuzi mu maso yanyu? Erega jewe ni jewe ubganje navyiboneye, ni jewe Uhoraho mbivuze. 12 Enda ni mugende ha hantu hanje i Shilo, aho natanguye gushira izina ryanje ngo rihabe, mwitegereze ivyo nahagiriye kubg’ ivyaha vy’abantu banje b’Abisirayeli.
    13 Kandi none, ko mwakoze ivyo bikorwa vyose, ni jewe Uhoraho mbivuze, nkaba nari naravuganye namwe nzinduwe no kubabgira, ariko ntimwumve, nkabahamagara ariko ntimwitabe; 14 nuko rero, nk’uko nagiriye i Shilo, ni ko nzogirira iyi ngoro yitirirwa izina ryanje, iyo mwizigira, ni ho hantu nabahaye, mwe na ba sogokuruza banyu. 15 Kandi nzobahinda mbirukane mu nyonga zanje, nk’uko nahinze bene wanyu bose, ni bo ruvyaro rwose rwa Efurayimu.
    Ni muzirikane ijambo ry’Imana ntimusamazwe n’ivyiyumviro vyanyu canke amajambo y’abantu. Abana b’Imana barangwa no kwumva no gukora.
    Umwami Yesu Kristo yamamare!

Abantu bariyahura cane mu gihugu, ntube muri ico gitigiri Yesu Kristo aragutabara.

ABANTU BATARI BAKE BARIYAHURA KUBERA IMIBABARO YO MU MUTIMA, NTUKABE MURI ICO GITIGIRI

Mu kirundi iyo umuruho urenze na cane ibibi biguma vyiyonderanya, uza wumva umuntu agize ati ukwiyahura kuraguma. Mu gihugu cacu c’Uburundi hariho abantu bashikirwa n’ibibabaza bitari bike. Ivyo navyo ukabisanga mu karere k’ibiyaga binini nka kose. Vyinshi usanga bifatiye ku bukene butagira uko bungana n’intwaro z’ibihugu ataco zifasha abanyagihugu atari ukubaremereza ingingo ugasanga abanyagihugu ntibaronka ivyo bafungura bikwiriye, iyo barwaye ntibaronka uburyo bgo kwivuza ntibabone kazoza kabo. Ku magorwa bene ayo hiyongereko ukutumvikana mu miryango bitera benshi kwihebura gushika naho bahitamwo kwiyahura.
Mu gihugu cacu, ukwiyahura kubera ibibabaza vyinshi bisa n’ivyabaye umugenzo kuko hari abaguma biyahura. Ibiharuro vyerekana yuko hariho umuntu yiyahura kira kwezi. Ivyo ntibihumuriza kuko ukwiyahura si ikimenyetso ciza ku gihugu kandi si n’ikimenyetso ciza ku miryango. Hariho ibiharuro vyigeze gutangwa vyerekana yuko ibice birenga 43 kw’ijana vy’abarundi bagendana ubumuga bg’ingwara zo mu mutwe mugabo ari leta canke izindi nzego ntizabihaye agaciro kubera ubukene burimwo n’ugushaka guke kw’ababijejwe canke kuko atariyo ntumbero yabo.
Uyu munsi tugeze aho ku munsi umwe hamenyeka yuko hiyahuye abantu babiri mu rwaruka. Hari igihe abo aribo baba bamenyekanye kuko hariho vyinshi bibera mu gihugu bitaja ahabona. Abamenyekanye biyahuye mw’ijoro ryakeye ni umwigeme Jeanette NIJIMBERE aturuka i Buhiga mu ntara ya Karuzi yiyahuriye mu Maramvya i Bujumbura. Hari n’umusore wo muri zone Cibitoke mu ntara ya Bujumbura nawe nyene basanze yiyahuje umugozi mu kwimanika. Ikibazo c’amagara y’abantu ama leta yarakwiriye kugifata mu ntoke ishizemwo umwete.
Mw’Ishengero rya Yesu Kristo-Ihanga Ryera Ry’Imana dusaba umuntu wese yaba umwana, umusore, inkumi canke uwukuze kurondera ubufasha ku bakozi b’Imana mu gihe bahuye n’ibibaruhisha mu mutima no mugihe bumvise iciyumviro co kwiyahura kibaciye mu vyiyumviro. Ukwiyahura ni icaha kitababarirwa gituma ugikoze aba yishe Umuntu kandi ata kandi karyo aronka ko kwihana. Ukwiyahura siyo nzira yo kurangiza ibibazo vyawe. Hariho Yesu Kristo yiteguriye kukugira uwidegemvya mu kugukiza imibabaro yawe yose.
Uragomba ubufasha, turondere kuri:
+1605 400 5580
+257 69 04 05 14
+257 69 10 81 30
+257 61 40 41 81
+27 63 184 7803
Umwami Yesu Kristo arakuruhura!

Umwanya uwariwo wose kuva ubu Uhoraho Imana ashobora gushitsa isezerano ku gihugu cacu.

“UMWANYA N’UMWANYA ISHENGERO RYA YESU KRISTO IHANGA RYERA RY’IMANA RIRASHITSWAKO AMASEZERANO Y’IJURU, ISHENGERO N’IGIHUGU” Gitega, VYIZIGIRO Akissa, imyaka 13 yiga muri 8 ème.

Akissa VYIZIGIRO ni umwana w’imyaka 13 gusa yiga mu mwaka wu 8 w’amashure shingiro mu ntara ya Gitega. Muri iri joro ryakeye yavyutse isaha umunani z’ijoro kugira ngo asenge nk’uko yama abigenza hagati ya sa munani na sa cenda z’ijoro, aca ajanwa mw’iyerekwa ridasanzwe. Nkuko mushobora kumwiyumvira kuri Radio Isezerano Internationale, yabanje kujanwa kwerekwa ibibera ikuzimu aho abo kwa satani bamusavye ngo ababgire amabanga y’Ishengero rya Yesu Kristo- Ihanga Ryera ry’Imana kuko abatumwe n’ikuzimu kuza kurisambura bose bahuye n’ingorane.

Yahavuye atwarwa kwerekwa ivyo mw’ijuru. Yagarutse azanye amabanga menshi kandi azaniye ubutumwa ISHENGERO RYA YESU KRISTO IHANGA RYERA RY’IMANA. Umuntu wese akizimagirika arakwiriye kuzimuruka akamenya yuko Uhoraho Imana yamaze kwitoraniriza IHANGA RYERA RY’IMANA ari naryo SHENGERO RYA YESU KRISTO kandi yuko abo BATORANIJWE yabahe amabgirizwa abagenga bagenderako, yabahaye ibendera GAKIZA, MUTABAZI na VYIZIGIRO kandi yanabahaye uburongozi bumwe n’amasezerano y’intahava yo kuja mw’ijuru, ayo ku gihugu n’ayo kw’ishengero. Uhoraho Imana ntagendana n’ihanga risabagiye kandi ritagira intumbero. Nico gituma yaduhaye “Umubiri umwe [Ishengero rya Yesu Kristo], Mpwemu umwe [Mpwemu Yera], icizigiro kimwe [Amasezerano ntabanduka], Umwami Umwe [Yesu Kristo], Ukwizera kumwe [Ugucungurwa na Yesu Kristo],Ukubatizwa kumwe[Muri Yesu Kristo], n’Imana imwe niyo Data wa twese, asumba bose, akoresha bose,ari muri bose” [Abanyefeso 4:4-6]

Uwo mwana Akissa VYIZIGIRO yeretswe ivyo mw’ijuru yazanye ubutumwa buhambaye yakuye k’Uhoraho Imana. Imana yacu iguma ishingira intahe ISHENGERO RYA YESU KRISTO- IHANGA RYERA RY’IMANA agira ati:

1. Umwanya n’umwanya Uhoraho Imana arashitsa ivyo yasezeraniye kuri mwebge ISHENGERO RYA YESU KRISTO- IHANGA RYERA RY’IMANA. Iyavuze ije gushitsa amasezerano.

2.Twese hamwe twirinde ntitube ibijora ariko twame kw’izamu nk’uko twayatondekewe n’ijuru, umwe wese yiyuzuze na mugenzi we, mwitandukanye n’imigambge, amadini n’amoko kandi ntihagire ukora icaha.

3. Hari vyinshi Imaza yamaze kurangiza kugira mu mpwemu no mu mubiriri kugira ngo ishitse amasezerano yayo, isigaje kubishira ahabona gusa.

4. Hariho abiyitirira Ihanga bataririmwo kuko batarizi, ngo kandi abo nibo bihaye kuvugira Uhoraho Imana yanyu ivyo atavuze, igiye guhigura nabo. Ntihagire uwujuragizwa n’ibihuhuta, mwumire kuvyo mwahawe.

Uwo mwana w’imyaka 13 gusa y’amavuka yatwawe mw’ijuru mw’iyerekwa hari vyinshi yokwigisha abavugabutumwa n’abavugishwa b’iki gihe kuko benshi baharamira ivyubahiro, amaronko no kwitwa abarongozi b’abantu. Kubona Uhoraho Imana yarihagurukirije Ishengero rya Yesu Kristo Ihanga Ryera ry’Imana idaciye kuri abo bantu bakunda ivyubahiro, amaronko no kwishira hejuru; vyabateye ishari n’inzigo bituma satani abagira imigambi yo kujuragiza abana b’Imana. Bamwe baciye bikorera ico bita “ihanga” ngo bahiganwe n’IHANGA RYERA Uhoraho Imana yihagurukirije, abanda nabo, atanagasoni bagira bigisha abantu ngo ISHENGERO RYA YESU KRISTO- IHANGA RYERA RY’IMANA ntiribaho ku buryo bugaragara, ngo ni abibaza bose yuko bizera aho bari hose mu madini no mu mashengero na Isilamu irimwo.

Abigisha izo nyigisho z’ikinyoma kw’ishengero rya Yesu Kristo-Ihanga Ryera ry’Imana, ni ukurogota k’Uhoraho Imana we yisangiye umuntu wese mu mutima akamwibira akabanga yuko yihagurukirije ihanga kugira ngo rimukorere ku mugaragaro nk’uko yahagurukije Isirayeli ya mbere ariko yihagurukirije isirayeli ya kabiri. Ni abantu baboneka, bazinanyi, bafise ico Uhoraho yababariye kandi bafise n’urugendo ruzwi neza. Yabikoze uko kugira ngo iryo Hanga ryiwe ryizere, ryihane, ryezwe kandi ryuzuzwe Mpwemu Yera maze rije gukwiza ishemwe ryiwe mu kwigisha abantu bose kwizera, kwihana, ribabatize, bezwe kandi buzuzwe Mpwemu Yera nabo bakorere Imana.

Uwigisha yuko ISHENGERO RYA YESU KRISTO- IHANGA RYERA RY’IMANA ari abantu bariko barihumaniriza mu madini n’amashengero. Ni igitutsi kandi ni ukutamenya umugambi w’Imana ku gihugu cacu. Naho woba uri umwigisha, umuvugishwa canke uwundi mu nyengabire, ucibaza yuko Ihanga Ryera rigizwe n’abantu bacifatanya n’amadini Uhoraho Imana yazinutswe, basanzaye kuko batagira uburongozi kandi badafise intumbero bahawe n’Uhoraho Imana; uwo muntu arateye ikigongwe. Akwiriye kuja kwihererana n’Imana ayisiguze kugira ngo areke kuyivugira ivyo itamutumye.  

Umuntu wese muzobona afise intumbero yo kuzana ibice muze mu muhanure mutariye umunwa kandi mu musengere kuko satani ariko akora cane ngo asamabure kandi ajuragize benshi ababuze kujabuka yorodani.

Umuntu muzobona afise ukwinubana, urwanko, inzigo, kudakunda abandi, yama arondera kwishira hejuru muze mu musengere kandi mu muhanure kuko ako ni akameremere ka satani, ubgibone.

Abantu boba bavuga ibihushane kuko bapfa ivyo amasezerano y’Imana barihenda cane kuko uwo Uhoraho Imana yamaze kutoranya ataravuka ivyo yamugeneye bidahinduka gushika isezerano yahawe rishitse. Nta muntu n’umwe ashobora gushingura akarimbi Yesu Kristo yashinze.

Iyo uriko urigisha abantu ijambo ry’Imana mu mashengero, ushinga intahe, canke usemerera mu masoko no ku bituro vy’ingenzi uhura na vyinshi. S’uko umu isiramu, umu shembe, umu Buda canke uwusenga Kiranga avuze agushingira intahe y’uko ari Imana y’ukuri yaguhagurukije uca wibaza yuko abo bantu bacitse aba Kristo Yesu canke batoranijwe. Haba nabamba, mwigire ku bapfumu.

Bibiliya iratwereka neza yuko impwemu zihumaye zishingira intahe abariko barakora umurimo w’Imana. « Bukeye tugiye aho basengera, duhura n’umwigeme arimwo dayimoni aragura, yaratungishije ba shebuja kubg’iyo ndagu. Uyo aradukurikira twebge na Pawulo, asemerera, at’aba bantu n’abasavyi b’Imana Isumba Vyose kandi bababarira inzira y’agakiza. Amara iminsi myinshi agenza atyo. Ariko Pawulo adundumiwe, arahindukira abarira dayimoni ati: Ndakubariye mw’izina rya Yesu Kristo muvemwo! Amuvamwo muri ako kanya. » [Ivyakozwe n’Intumwa 16 :16-18]

Akissa VYIZIGIRO, uwo mwana w’imyaka 13 gusa yamavuka yabariwe n’Uhoraho Imana yuko twahawe amaso y’impwemu nayo umubiri yo kubona. Uhoraho Imana aratugabisha ngo tumenye yuko hariho abiyita abavugishwa banyuragira mu misozi itandukanye mugabo atari Uhoraho Imana yabatumye. Bamwe basanzaza imburi zabo ku mihora itandukanye, abandi bakagendera ibicaniro bitandukanye bigisha ibinyoma. Kugira ngo bareshe abantu batanguza ubuhanuzi bg’ukuri bumvana abavugishwa b’Ihanga Ryera ry’Imana hanyuma bagaheza bakabuvanga ibinyoma vy’amarangamutima yabo. Mwitondere abigira abavugishwa, ntimujane nyabahururu.

Nk’uko Uhoraho Imana abicishije mu butumwa, abavugishwa n’abasemerezi batandukanye, yabishikirije abantu bose; iki ni ca gihe co gucagagura imigozi y’ikintu cose cokubuza kwibonera ubgiza bg’Imana. Ni mube kure y’imigambge n’imihari, amadini n’amashengero, amoko n’imiryango, n’icaha icarico cose kugira ngo ube mu Mana yonyene. Mukomeze kwumvira Mpwemu Yera muri vyose.

                                 Umwami n’Umukiza Yesu Kristo yamamare!

Hanga Ryera ry’Imana, Shengero rya Yesu Kristo ni mwitegure kwakira amasezerano/ Jean Bosco Barakamfitiye.

“HANGA RYERA RY’IMANA, ITEGURE KUKO MUGIYE KWAMBUKA YORODANI MUSHITSWE KU MASEZERANO Y’IMANA.” Jean Bosco Barakamfitiye 24/10/2021.
Uyo muvugishwa yahawe ubutumwa buvuga yuko “ISHENGERO RYA YESU KRISTO – IHANGA RYERA RY’IMANA ryo kwitegura kuko bagiye kwambuka Yorodani kugira ngo bashikanwe mu masezerano.” Uhoraho Imana yararivumereye. Ubgo butumwa yemeza neza yuko yahawe n’ijuru ubgabgo burikwije nta kindi co kugerageza kubgambika bukeneye kiretse ugomba kubuha intumbero atari iyo Imana. Uyo muvugishwa yagerageje gusigura icarico ISHENGERO RYA YESU KRISTO-IHANGA RYERA RY’IMANA nkuko aritahura mu bgenge bgiwe nk’umwana w’umuntu. Bibiliya Yera niyo yonyene muhinga adutomorera icarico ISHENGERO RYA YESU KRISTO – IHANGA RYERA RY’IMANA.

  1. Yohana, intumwa ya Yesu Kristo yeretswe IHANGA RYERA RY’IMANA-ISHENGERO RYA YESU aca yandika mu [IVYAHISHURIWE YOHANA 7:9-10] ati: “Hanyuma y’ivyo mbona ishengero ryinshi, atawoshobora kuriharura, bo mu mahanga yose, n’imiryango yose n’amoko yose yose n’indimi zose, bahagaze imbere y’iyo ntebe n’imbere y’umwagazi w’Intama, bambaye imvune zera bari n’amashami y’ibigazi mu minwe: Basemerera n’ijwi, bati agakiza ni ako Imana yacu ivyagiye ku ntebe n’akumwagazi w’Intama.”
  2. Umuvugishwa n’Imana Mose akaba ari nawe yari yatoranijwe n’Imana ngo arongore Ihanga rya Isirayeli, yibukijwe abatoranijwe n’Imana abaribo kandi yuko bategerezwa kwitandukanya n’ayandi mahanga. Yanditse mu [GUSUBIRA MU VYAGEZWE 7:6] ati: “Kuko muri IHANGA RYERA RYAROBANURIWE Uhoraho Imana yanyu; kandi Uhoraho Imana yanyu yabatoranije mu mahanga yose yo kw’isi ngo mube Ihanga yiharije.”
  3. Intumwa Petero aratubarira ivyo Ihanga Ryera ry’Imana, Ishengero rya Yesu Kristo muri [1PETERO 2: 9] yanditse ati: “Ariko mweho muri ubgoko bgatoranijwe, mukoranije kuba abami n’abahereji, muri Ihanga Ryera, abantu bashiriweho kuba inyegu yiharije, kugira ngo mukwize ishimwe ry’Iyabahamagaye, ikabakura mu mwiza ikabashira mu muco wayo utangaje.”
    Nk’uko duhabga umuco n’iyo mirongo yo muri Bibiliya Yera, umuntu wese aratahura icatumye Uhoraho Imana atwita ISHENGERO RYA YESU KRISTO-IHANGA RYERA RY’IMANA. Ni uko turi abizeye Yesu Kristo, bihanye ivyaha vyabo, bejejwe, bujujwe Mpwemu Yera bagakorera Uhoraho Imana kuko twahawe iryo sezerano ry’ubgami bg’Imana. Ihanga Ryera ry’Imana ni Ishengero rya Yesu Kristo, basanzariye mu bihugu bitandukanye, mu madini n’amashengero atandukanye mugabo noneho Yesu Kristo yabahamagaye ngo bamukurikire we ubgiwe aheze abarongore mu kubashitsa ku kugororoka kwose.
    Uwatanze ubuhanuzi buvuga ngo SHENGERO RYA YESU KRISTO-IHANGA RYERA RY’IMANA NI WITEGURE KWAMBUKA YORODANI, ntiyihenze kuvuga yuko hariho abakoresha izina IHANGA RYERA ukutariko mugabo nawe yihenze cane mu kuvuga ivyo amadini agaheza akavuga yuko mw’Idini rya Islamu hariyo abizeye Yesu Kristo kuba umwami n’umukiza w’ubugingo bgabo, babatijwe kandi bagahabga Mpwemu Yera mugabo bakaguma muri iryo dini barindiriye.
    Ntakuri kurimwo kuko isilamu ntiyemera Uhoraho Imana Yehova n’akaranga kayo kandi ntiyemera Yesu Kristo yuko ari Imana yigize umuntu kugira ngo icunguze abaremwe bose amaraso yayo ku musaraba. Iyo avuga yuko muba isiramu nko muyandi madini hariho abazokwizera Yesu Kristo, abazihana, bakezwa kandi bakuzuzwa Mpwemu w’Imana aho yari kuba avuze ukuri kuko ubu butumwa tuvuga mw’IHANGA RYERA RY’IMANA arico bugamije. Nayo ahandi Bibiliya iratubgira yuko impwemu yose n’umuntu wese atatura yuko Yesu ari Kristo kandi yuko ari umwana w’Imana ntiba yavuye ku Mana. [1 YOHANA 4:3, 4:15].
    Impwemu yo kubohwa n’amadini n’amashengero izingamitse abantu benshi. Hariho abakoresha ubgenge bgabo bakigisha ubgoko bg’Imana ngo nibasohoke canke ngo ntiharagera gusohoka mu madini, baragabe kuko bazosanga bariko baranyinyurana n’Imana mu gufata ikibanza ca Mpwemu Yera. N’ubu tuguma twibutsa umuntu wese kwigiza kure ivyerekeye imigambge n’imiharari, kwirinda gufatwa n’amadini n’amashengero; kwiyambure amacakubiri y’ubgoko n’imiryango kugira ngo atandukane n’icaha cose n’igisa naco. Aho niho wo kwihererana n’Uhoraho Imana kugira ngo ayisiguze ico akwiriye gukora. Umuntu wese ku giti ciwe ni amenye ico Uhoraho Imana imushakako kuko niyo yamuhamagaye kandi izi umugambi imufiseko. Rongorwe n’Imana [Abaroma 8:14].
    Umuvugishwa Jean Bosco Barakamfitiye yagize incamake z’inyigisho zisanzwe zica ku mihora y’ISHENGERO RYA YESU KRISTO-IHANGA RYERA RY’IMANA zerekeye ibibi abantu bakora kw’isi kandi biyita yuko ari abanyamashengero kandi bakijijwe, izo nyigisho zigahamagarira abantu bose kwizera, kwihana no kwezwa kugira ngo abantu bazobone ukugira neza kw’Imana. Dusabe abavugishwa kuja barashikiriza ivyo baba bahawe batavyongeyeko canke ngo babigabanye, na cane cane bareke kubivanga n’inyigisho zabo no gutahura kwabo kuko abantu bakenera kumenya ico Uhoraho Imana yavumereye gusa. Hari umwanya wo kuvugishwa, hakabaho n’umwanya wo kwigisha. Ikintu cose mu mwanya waco.
    ISHENGERO RYA YESU KRISTO IHANGA RYERA RY’IMANA, si idini canke Ishengero nkayo yandi mashengero mubona; ni umugambi w’Uhoraho Imana wo kwegeranya intama zayo, gutegura umugeni wa Yesu Kristo no gutwara ubutumwa bga nyuma bg’ivugururwa, umuvyuro n’ikanguro kw’isi yose. Nta kivange c’amadini n’amashengero co shitsa iyo ntumbero y’Imana, nta bantu batejejwe ngo bavugutirwe bojana ubutumwa kw’isi; ni abatoranijwe bagahabga ubutware n’ubushobozi bonyene bahawe iryo banga.
    Umwami Yesu Kristo yamamare!