AMASENGESHO Y’IHANGA RY’IMANA RYOSE ARATANGURA MUKANYA.

Nk’uko Uhoraho Imana yacu yatumiriye abizera bose gusenga iminsi itatu amagenekerezo ya 10, 11 na 12 z’uku kwezi twisonzesheje, amasengesho tugira tuyatabgure muri Australia na Aziya, hanyuma Afrika na Bulaya hace hakurikirako Amerika, Canada na Amerika Latine uko izuba rigenda rirareka ku mubumbe w’isi.
Muribuka yuko urutonde twahawe ari ugusenga twezwa tukavugutirwa, ugusenga tubohoza ababoshwe hanyuma tukaboha inkomezi z’umwijima, no guhwekera imbere y’Imana tugasigwa amavuta y’ijuru.
Mwibutse abantu bose yuko ya masengesho ahambaye yageze.

UMUTUMIRO W’AMASENGESHO YO KW’IGENEREZO RYA 10, 11NA12/03/22

Hanga Ryera ry’Imana aho muri hose k’umubumbe w’iy’isi tubayeko, murazi yuko Uhoraho Imana yadutoranije ngo tube Ihanga Ryera ryiwe yiharije nkuko yari yarirobanuriye Ihanga rya Isirayeli igihe yaha ABURAHAMU isezerano, sogokuruza bacu mu kwizera; igihe yahindurira YAKOBO Izina akamwita ISIRAYELI. Uhoraho Imana yaratwirobanuriye ngo tumubere Ihanga ryiwe kubgo urukundo n’imbabazi ziwe, aduha isezerano ry’intahava aturongoza Mpwemu wiwe ijoro n’umurango ari nawe yamana natwe muri uru rugendo rwo kwizera turimwo.
Twatewe iteka kuba abaraganwa na Krito Yesu, twatewe iteka kuba abatoranirijwe gutwara umuvyuro n’ikanguro mu gihugu no kw’isi yose. Twatewe iteka kuba Ihanga Ryera ry’Imana, inyegu yiharije kandi twari inkengerwa mu yandi mahanga. Ubu rero harageze yuko duhaguruka tukegera Uhoraho Imana yacu ku buryo budasanzwe kanatsinda niwe yaduhamagaye adutumirira aya masengesho yo kwitanga guhera kw’igenekerezo rya 10 gushika kw’igenekerezo rya 12/03/2022. Nkuko aya masengesho adasanzwe, twahawe urufatiro n’urutonde rwayo bidasanzwe. Ababishoboye bose bazokwirinda kunywa no kurya iyo minsi itatu yose, abanda bazohora banywa kandi bafungura mw’ijoro gusa.
URUFATIRO
Nkuko twabimenyeshejwe n’ijuru nta kindi kitujanye muri aya masengesho yo kumara iminsi itatu twisonzesheje turi imbere y’Uhoraho Imana Isumba Vyose atari ukugira ngo TWEZWE GOSE [2 Timoteyo 2: 19-21] kandi DUHWEKERA IMBERE Y’IMANA [Ab’I Filipi 4:6-8, Abikolosayi 3:12-17]. Ibisigaye ni amabanga yayo.
URUTONDE

1. Umunsi wa mbere w’aya masengesho, igenekerezo rya 10/03/2022 uzoba ari umunsi wo kwezwa gose. Umuntu wese ku giti ciwe n’aho azoba ari hose, azokwishira ku munzane, yirimbure kandi areke Mpwemu w’Imana amusuzume mu mpwemu, mu mubiri no muri kamere kiwe aheze agorore ibihoramye, atunganye kandi atunganire Uhoraho Imana n’abantu kugira ngo avugutizwe yezwe gose.
2. Umunsi ugura kabiri w’aya masengesho, igenekerezo rya 11/03/ 2022 uzoba ari umunsi wo gusengera imitwaro y’ababoshwe mu mubiri no mu mpwemu kugira ngo nabo bazobone umwidegemvyo muri Yesu Kristo n’ubgiza bg’Imana. Muri aya masengesho, mw’izina rya Yesu Kristo, tuzobohoza abacu bose baboshwe [Matayo 16:19]. Tuzobohora:

• Ababoshwe n’ubushobozi bg’abarozi n’amangetengete,
• Ababoshwe n’igitsure co mu ngo n’imiryango,
• Ababoshwe n’ivyaha vyabizinfiriyeko bikanka yuko bakizwa,
• Ababoshwe n’impwemu zihumanye zidatinya icaha,
• Ababoshwe n’inyigisho z’ibinyoma bakanyegezwa ukuri,
• Ababoshwe n’imihari, imigambge n’amadini,
• Ababoshwe n’akaronda k’imiryango n’ibisekuru,
• Ababoshwe n’ubukene n’impwemu zihumanye z’inyatsi,
• Ababoshwe n’ingwara z’umubiri nizo impwemu,
• Ababoshwe n’ishavu, ishari n’inzigo,
• Ababoshwe n’impwemu z’amanyama, ubgibone n’ukwikakisha,
• Ababoshwe no kudahitamwo kuba ivyaremwe bisha,
• Ababoshwe n’impwemu zo gutambikiza muvy’Imana no muvy’isi,
• Ababoshwe n’impwemu zo gukorana imirimo y’Imana n’ivyaha,
• Ababoshwe n’impwemu zo gusengana ivyaha,
• Ababoshwe no gutambikiza mu madini babuze urutonde rw’Imana,
• Ababoshwe n’ibinyoma vyo kwibeshera no kubeshera abandi,
• Ababoshwe no kubeshera Imana ngo yavuze kandi ataco yavuze,
• Ababoshwe kubera impwemu zabo zatanzwe i kuzimu,
• Ababoshwe n’impwemu zabayoberanije zibacurikira ubgenge,
• Ababoshwe n’impwemu zo kutizera no kwisuzugura,
• Ababoshwe n’impwemu z’amacakubiri y’amoko intara n’imiryango,
• Ababoshwe no kwipfuza kw’umubiri n’impwemu,
• Ababoshwe n’impwemu z’akaborwe n’ibiyovyabgenge,
• Ababoshwe bagakubagurwa n’impwemu zihumanye zitandukanye.
• Mw’izina rya Yesy Kristo tuzoboha impwemu zihumanye zose zikurikiza Abera, abatoranijwe, abahawe amasezerano, Ishengero rya Yesu Kristo-Ihanga Ryera ry’Uhoraho Imana.

1. Umunsi ugira gatatu igenekerezo rya 12/03/ 2022, ni umunsi wo guhwekera imbere y’Uhoraho Imana, twumviriza ico Data atubarira, impanuro ziwe n’iganuke ry’ijuru. Uwo munsi tuzoririmba ngo “SHITSA MANA SHITSA ISEZERANO”, tuzotazira, dushime, dutambe dutarike. Uzoba ari umunsi wa karuhuko n’amakoraniro y’Abera bose. Tuzokwigina Umwami wacu Yesu Kristo yimye ingoma mu mitima yacu no mu gihugu cacu.
   Umuntu wese asabge gutumirira abagenzi biwe boze, incuti n’imiryango n’abo uzi bose aya masengesho yo kwezwa gose no guhwekerera imbere y’Uhoraho Imana. UMWAMI N’UMUKIZA WACU YESU KRISTO YAMAMARE!

UWITWARARIKA IVYUBUGOROROTSI N’IMBABAZI ARONKA UBUGINGINGO,UBUGOROROTSI N’ICUBAHIRO [Imigani 21:21]

Uko umutima wawe wibanga ukirinda kwiyanduza niko uba umunyakuri aho uba uri hose. Ukuri ni ikintu cananiye abantu benshi abato n’abahambaye. Urashobora kuba wama ushaka kugororoka uvuga ukuri mugabo ibinyoma bikakwitangira imbere. Aho ntaco kuko uba uzotinda ukabohoka kuko bituma uguma usenga utakamba ngo Imana igutabare yirukane ibinyoma maze ukuri kwiganzire muri wewe. [Abaroma 7:19-21]
Abantu basa n’abapfuye ni abibaza yuko ukubesha ataco bitwaye maze bakabikorana imirimo y’Imana, bakabisengana kandi bakagira amahoro mu mitima yabo nk’uko umengo ntibikoreye akaziri.
Abo naho bitwa abakozi b’Imana, abakijijwe canke ayandi mazina meza menshi ntibatinya kubesha no kubeshera abantu n’Imana. Ntibatinya gusobeka ibinyoma vyabo mw’ijambo ry’Imana, mu buhanuzi no mu masezerano y’Imana. Ntibanatinya kwambika iceyi n’urubga abandi bakozi b’Imana mu binyoma kuko barangwa na kameremere kabo bakongera bagasunikwa n’impwemu zihumanye gukora no kuvuga ibitabahesha icubahiro kandi bitanahesha icubahiro Imana.
Umunyabinyoma umumenya neza iyo ashavuye canke iyo afise ubgoba. Ntashobora kwiyumanganya iyo yihebuye canke ageze mukibazo kuko umutima wiwe uca wigaragaza. Ikinyoma kimeze n’kurumogi, ikiyovyabgenge n’akaranda mukwandukira. Ugendana n’abanyabinyima ugasa nabo. Umunyakinyoma nti yubaka arasambura kandi ntiyegeranya arasanzaza. Mu minsi y’amahoro womwihendako ukibaza yuko muri kumwe mu rugendo mugabo mu gihe co kugendana n’Imana uyo araguhinduka.
Umunyakuri ukugororoka kwiwe kumubera amababa amudugana mw’ijuru ariko umunyabinyoma, ukugabitanya kwiwe kuramuherekeza no mumva yiwe.
Mwiyambure ibinyoma vyose, uburyarya, ukwishanya, amajambo mabi n’ubugunge kugira ngo turamirize mu rugendo ruja mw’ijuru.

WAME UNEZERERERWA UHORAHO IMANA MURI VYOSE KUKO NTIZOGUHEMUKIRA, NTAMUGOROROTSI WAYO YAHEVYE.

Aha munsi y’izuba hari vyinshi kandi havugwa vyinshi. Abantu benshi babayeho bijogota, bidoga bagatukana mbere bagashika no ku rugero rwo guhangara Uhoraho Imana mu majambo yabo kandi bakibaza yuko ari uburenganzira. Ivyo bishika kubera, ubgambere imico n’imigenzo vy’abapagani batazi Imana isigaye yarandukiye abitirirwa izina ry’Uhoraho Imana. Ab’Imana barakwiriye kwisa abapagani nabo bakisa. [2Abikorinto 6:14]
Ikindi gituma abantu bavuga ibibajemwo vyose n’uko cane cane mu Barundi twibaza yuko tuzi vyose, umuntu ataco yibanga akiyumvira yuko ivyiyumviro vyiwe ari ukuri canke ivyo abandi bahurijeko bica biba ukuri bigatuma uwariwe wese avuga ibimujemwo vyose.
Ukuri ntiguhinduka canke ngo guhindukizwe. Naho abantu bose bovuga yuko ikintu cirabura ceze ntibihindura yuko icirabura kiguma cirabura kandi yuko icera kiguma cera. Abantu imico yabo yokwononekara canke yoreka ijambo ry’Imana ryoryo riguma ari inkota ikarishe itandukanya igufa n’umusokoro ikanatandukanya mpwemu n’umutima kuko ntaho ryimirwa. [Abaheburayo 4:12]
Ntukaje kumohe y’abantu. Bagombe babe abavugabutumwa canke bahanuzi basizwe amavuta angana gute, uwuciye kubiri n’ijambo ry’Imana akagira inyifato n’imvugo itabereye ntakakunyiganyize. Benshi babongeka amajwi yabo nk’abuzuye Mpwemu Yera kandi ari uburyarya. Abandi bagerageza kuvuga amajambo meza menshi ngo bahimbare ababumva kandi ari amabingira mu mitima yabo.
Mw’Ishengero rya Yesu Kristo Ihanga Ryera ry’Imana nti twahamagariwe kwuzuza abantu mu mashengero yacu kugira ngo turonke ibigiracumi n’amamashikanwa birwiriye, ivyo biragahera. Tuvuga ubutumwa ijoro n’umurango tukama turiko turasenga kugira ngo abanyavyaha bihane bakizwe ntibaje muri gihonomu. Ivyo nivyo bidutandukanya n’amadini, ivyiyita amashengero n’imirwi y’abantu itandukanye. Umuntu wese yakiriye Yesu Kristo kuba Umwami n’Umukiza w’ubugingo bgiwe, akihana, akezwa akama areretse amasezerano y’Imana y’ijuru, Ishengero no ku gihugu; uyo ni intama yo mu ruhongore rwa Yesu Kristo-Ihanga Ryera ry’Imana.
Ntuba ugikangwa n’ingene abantu bakubona canke bakuvuga. Ntuba ugiterwa ubgoba n’imigambi ya satani n’imigabo y’abanyakibi kuko dufise isezerano yuko ibibi vyabo vyose Uhoraho Imana abihinduye imigisha yacu. Imivumo yabo iduhindukiye imihezagiro, amen! Umwami Yesu yamamare!

UMUNTU WESE YIBAZA YUKO ATA MASEZERANO Y’IGIHUGU NAYO ISHENGERO AHARI N’UKO ABA ADASHOBORA KWUMVA IJWI RY’IMANA.

Ikintu ciswe amasezerano y’Imana ni ikinyegezwa kuri benshi kikaba ubupfu kubatizera kakaba n’akayobera bahinga ku muntu wese adashobora kwumva ijwi ry’Imana.
Hariho abantu benshi bashira ikiryoha muvyo amasezerano mbere bakanemeza yuko hari ico bumvise canke barose bakavuga yuko ari Imana yababariye kandi muvyo ukuri kwari ukwipfuza kwabo kwatumye bagira indoto canke bakumva amajwi yo mu mutima ariko ataco Uhoraho yababariye. Mwene abo barambirwa n’ingoga kandi babivuyemwo bavuga amajambo mabi yo guca intege abateramiye ayo masezerano.
Uwahawe isezerano n’Imana, yironkeye ijambo rivuye mu kanwa kayo akaronka n’ibimenyamenya yuko ariyo yavuganye nawe, uyo ntanyiganyiga naho ba sesa nkuyoze bohagurukira rimwe. Ahubgo uko bavuga yuko ayo masezerano atayahari canke yuko yasivye, wewe Uhoraho Imana iguma imwereka yuko ahubgo agiye gushika. N’ubu niko biri. Abahora bita imbere mukuvuga yuko bazi ivyo amasezerano gusumba abandi bararambiwe bamwe barabivamwo abandi bafatwa n’impwemu zo gukekeranya. Ariko tweho, Uhoraho Imana aguma atumenyesho yuko amasezerano yaduhaye ari hafi ngo turusheho kuyateramira. Twame twiyeza tuyateramiye kuko ari hafi kandi twamamaze Umwami wacu Yesu Kristo.

IMBURI N’UBUHANUZI BIVUYE KU WAJANYWE MW’IJURU AKIBIRWA AMABANGA N’UHORAHO IMANA.

Ncuti namwe bagenzi musoma urubus rw’Ihanga Ryera ry’Imana ndabaramukije amahoro ya Yesu Kristo. Ishengero rya Yesu Kristo-Ihanga Ryera ry’Imana ryagiriwe ibakwe ku buryo Uhoraho Imana avugana natwe akaturongora iminsi yose. Iyo dusenze Mpwemu w’Imana arururuka akaganira natwe. Niwe aduhishurira abafise ubuvugishwa bg’ibinyoma n’abavagiwe bagasukiranya ubuvugishwa n’amaranga mutima yabo. Nico gituma duhamagarira umuntu wese kugendera mu muco kuko aturasira ijoro n’umurango.
Ubuhoho yaraduteye iteka kuko hariho beneData batwarwa mw’ijuru bakabarirwa amabanga atomenywa n’uwariwe wese. Kw’igenekerezo rya 18 na 19 Umuvugishwa n’Imana Louiza yatwawe mw’ijuru iyo minsi ibiri yagarutse yabariwe amabanga y’Ijuru, ayo ishengero nayo igihugu. Yazaniye ubutumwa abantu batandukanye kandi umwe wese twaramushikirije ivyiwe, ubu naho tugire tubashikirize ubutumwa bg’Ihanga Ryera ryose. Mumutege amatwi radio Isezerano Internationale hanyuma twese tugire ingendo ibereye abana b’Imana. Umwami Yesu Kristo yamamare.

UMWAMI YESU KRISTO TUMWAMAMAZE HOSE YAMASENGESHO Y’INKOMEZI YATANGUYE K’ISI YOSE.

Ishengero rya Yesu Kristo-Ihanga Ryera ry’Imana ryatanguye ya masengesho y’inkomezi y’umunsi umwe yo kwiyiriza twegereye Uhoraho Imana kuri iri genekerezo rya 19/02/2022.
Imana ikeneye abantu bayikorera kandi bakayisenga barihanye ivyaha vyabo kandi bejejwe. Turagomba yuko Imana y’Ihanga Ryera ivugana natwe kandi yiyerekane. Umwami n’Umukiza wacu Yesu Kristo yamamare!

UMUTUMIRO W’AMASENGESHO Y’IHANGA RYERA RY’IMANA

Twebge abana b’Imana, abatoranijwe tugahabga isezerano ry’intahava ntituguma tureka ngo satani n’abadayimoni agume akubagura abakozi b’Imana mu kubateza ubuzimire, ububeshi, amanyama, ugusambura binyegeje mw’ijambo ry’Imana. Ubgo kuri uyu wa KARUHUKO igenekerezo rya 19/02/ 2022 tugiye imbere y’Imana, tuzosengera amasengesho twahawe twongere dusengere n’abo bahemutse kubera ivyaha bakora bagata imirimo y’Imana bakisuka mu gukorera satani mugukwiragiza ibinyoma kugira ngo abantu basanzare, bagwe babivemwo.
Ihanga Ryera ry’Imana ryose riratumiriwe mu masengesho yo gusenga no kwiyiriza ku munsi wa KARUHUKO igenekerezo rya 19/02/2022. Uhoraho Imana yacu yadutumiriye kumwegera kundi twiyejeje ngo dusengere n’imitwaro.
URUFATIRO
“Ntimugire ico mwiganyira, ariko muri vyose ivyo mugomba bimensheshe Imana, mu gusenga no kwinginga bifatanije no gukenguruka.” [Abifilipi 4:6]
“Musengere muri Mpwemu ibihe vyose, mu buryo bgose bgo gusenga mwinginga, kandi ivyo mubibere maso, mukobeje rwose, musengera abera bose” [Abayefeso 6:18]
IMITWARO TUZOSENGERA
1.Tuzosengera amasezerano yacu y’ijuru, ay’Ishengero n’ay’igihugu.

2. Tuzobohoza ababoshwe bari mu ngoyi za satani batwawe akayombekere:

• Tuzosengera abakorana ivyaha imirimo y’Imana;
• Tuzosengera abaguye mu nyigisho z’ibinyoma n’ubuzimire;
• Tuzosengera abikuye mu amasezerano y’Imana bashaka kuyatesha n’abandi;
• Tuzosengera abazinzwe ingwara, ubukene n’umwiheburo;
• Tuzosengera abakubagurwa n’impwemu zo kuzangazanga no kujuragirika;
• Tuzosengera ababoshwe n’impwemu zo gusukiranya ivyo Imana n’ivyo mw’isi;
• Tuzosengera ababoshwe n’impwemu z’ubusamvanyi no kw’isambanya;
  -Tuzosengera abakubagurwa n’impwemu zo gutambikiza mu madini;
  -Tuzosengera abakubagurwa n’impwemu zo gukunda ivyubahiro n’amaronko;
• Tuzosengera abakubagurwa n’impwemu yo kwikakisha n’ubgibone;
• Abakubagurwa n’impwe mu z’abapfumu z’abarozi n’abakinzi;
• Tuzosengera abasambuye ibicaniro bakirema ibice bamenye ibanga;
• Tuzosengera abakubagurwa n’impwemu z’ukwihora, ukubesha n’amashavu;
  Tumirira beneData bandi muri aya masengesho kuko hari ico Uhoraho agira yikorere abantu bose babiboneshe amaso batangare.
  Umwami n’Umukiza wacu Yesu Kristo yamamare!