Evelyne wo mu ntara ya Makamba yaraye atabawe n’izina rya Yesu Kristo.

IMANA DUSENGA SI IKIGIGWAMANA KANDI SI IVYIYUMVIRO VY’ABANTU NI IMANA IVUGA KANDI IKORA IGATABARA MW’IZINA RYA YESU KRISTO.

Abarozi n’abapfumu barakora ivyabo kandi abantu iyo batamenye yuko mw’izina rya Yesu Kristo ririmwo ubushobozi butabara abagowe, bubohora imbohe bukakiza ingwara ; abo bantu barapfa kubera ukutamenya. Imana yavuze yuko abantu bayo bishwe n’ukutamenya [Hoseya 4:1]
Satani, abadayimoni n’ibikoresho vyabo nabo ntakindi bakora atari ukukwigisha ibinyoma, ukugusamaza no kukwibagiza ukuri. Kuko iyo umenye ukuri nakwo kuca ku kubohora. [Yohana 8:31-32]
Ukwo kuri n’uko atarindi zina ryo gukirizwamwo ikuzimu, mw’isi no mw’ijuru atari izina rya Yesu Kristo. Ni izina ryonyene[ Ivyakozwe n’Intumwa 4:10-12]
Ngiryo ibanga kandi nguko ukuri. Ububi bgose bushaka kugukura kuri iryo zina. Abadayimoni bose bashaka kukwibagiza iryo zina. Imburabgenge zizokubgira ngo Yesu si Kristo kandi Kristo si Yesu, banguha. Kristo risigura Mesiya ariwe Yeshuwe nkuko abaheburayo bakivuga.
Muri iryo zina ibiri mw’ijuru, ibiri kw’isi n’ikuzimu birapfukamika amavi yavyo. [Abifilipi 2:9]
Evelyne wo mu ntara ya Makamba yaraye atabawe n’izina rya Yesu Kristo. Baramuroze ararwara inda ikavyimba akaguma aza aribaruka ibiboho. Yaragiye mu bitaro bikuru bikuru vyinshi mugabo nta numwe yamufashije, gushika rya zina rya Yesu Kristo rihamagawe n’abera bari ku gicaniro c’amasengesho.
Uyo Evelyne abarozi bamushizemwo ibintu vyinshi vy’umwanda. Ivyo bintu yarabimaranye imyaka itatu inda yaravyimvye nk’uwibungenze mugabo Imana iramutabara kubera amasengesho y’abera. Uyu munsi aridegemvya. Imana yonyene, yirungikiye umumarayiko wayo ara mukora abandi bose yabanje kubasohora. Twaciye twibuka uwundi yitwa Serge aba ibubanza yagiriwe ugukorwa (operation) y’ingwara y’umutima n’umumarayika. Uravye ibintu vyaraye bimuvuywo uca ubona yuko abakozi ba satani ari abaja.

Yesu Kristo niwe wenyene yogutabara. Izindi nyigisho ni ububeshi.

INYIGISHO ZOSE N’IBIKORWA VYOSE BIDASHINGIYE KURI YESU KRISTO NI UBUZIMIRE NO GUTA UMWANYA W’UBUSA.

Mugihe Abarundi bitegurira kuba mw’ivugururwa, umuvyuro n’ikanguro nk’uko vyasezeranywe n’Uhoraho Imana akatwirobanurira nk’uko yari yaritoranirije abaheburayo; ubuhanuzi bukomeza kwururuka buvuye mw’ijuru budukangurira kwambara ibirato vy’ubutumwa bgiza bg’umusaraba.
Uhoraho Imana akangurira abizera bose kuba inderetsi n’abatasi b’ubgami bga Yesu Kristo kuko igihe kiriko kiregereza. Amashengero yose, imirwi yose canke umuntu wese inyigisho n’ibikorwa bidashingiye kuri YESU KRISTO, ukwihana ivyaha, ukwezwa n’ukwuzuzwa Mpwemu Yera; izo nyigisho si izo ukuri kandi n’ibikorwa vyabo vyose n’impfagusa.
Uba umwana w’Imana aruko wizeye Yesu Kristo, ukihana ivyaha vyawe, ukezwa maze ukarongorwa na Mpwemu Yera, nta kindi. [Abaroma 8:14]
Mube maso ntihagire uwuzimizwa, uwunyerezwa canke ngo asamazwe n’abahagarara ku murongo, ku migenzo canke ku kandi kantu ngo agukure ku gukurikira no gukorera Yesu Kristo wenyene. Nta kindi kibaho cogukiza mw’isi no mw’ijuru atari Umwami n’Umukiza Yesu Kristo.
Niwe wenyene aharira ivyaha vyose,
Niwe wenyene akiza indwara zose,
Niwe wenyene azogutabara amagorwa
Niwe wenyene agushoboza kugororoka
Niwe wenyenye aguha Mpwemu Yera
Niwe wenyene azokuzura mu bapfuye
Niwe wenyene aguha amahoro.
Niwe wenyene, niwe wenyene yitwa YESU KRISTO, MESIYA, UHORAHO uwuriho, yamyeho kandi azokwamaho.
Uwariwe wese akuzanira ubutumwa budashingiye kuri KRISTO YESU uramwigizeyo ntakubuze kwambuka. Izina ry’Umwami Yesu urijane aho uja hose. [2Abikorinto 2:14]

Amakungu arindiranye igishika Abarundi bahawe isezerano ry’Imana.

ABERA B’IMANA AHO BARI HOSE BAKOMEZE KWITEGURIRA KUBA MU MASEZERANO UHORAHO IMANA YADUHAYE.
Abarundi, Uhoraho Imana yaduhaye amasezerano y’intahava. Yerekeye igihugu n’ishengero. Benshi barayizeye mugabo abanda bayamiriye kure. Abayizeye satani yabasutsemwo impwemu y’ububeshi, ubuzimire, ubgibone, gusukana no kwihererezako ayo masezerano kugira ngo ducanemwo nawe atuburabuze. Harageze yuko umwe wese amenya ico yahamagariwe yihane, yezwe ace bugufi kugira ngo tujabuke. Aho hanze amakungu ararindiriye ubutumwa bgiza bubohora bg’ivugururwa, umuvyuro n’ikanguro tuzojana Uhoraho yaduhaye.
Abakijijwe twese ata n’umwe avuyemwo, tugire urunani, twame turaba imbere duhagaze ku masezerano Uhoraho Imana yaduhaye. Mugihe Imana ibicishije mu bavugishwa nayo batandukanye iguma itwibutsa kuba maso, kwezwa no kwama dusenga, hariho abaguma mu bgibone, ubuzimire n’ubusamazi. Satani yarateye imbuto mbi mw’ihanga ry’Abarundi aho hibonekeza urwanko, amajambo mabi, ugucokorana, imitongano no kurondera kutumvikana ku kantu akariko kose. Ivyo biterwa n’imbuto mbi z’umurwanizi twese dukwiriye kwirinda:
1 – Ubgibone: Hari abishira hejuru, abiyimika ngo ni abami n’abaherezi, abavuga abakozi b’Imana ukutariko n’izindi mvugo z’ikidayimoni. Ijambo ry’Imana rihamagarira abera bose guca bugufi, kugira ubgenge n’ubgitonzi. Ntukifatanye n’inshirasoni n’abigira intumwa z’Imana batagendera ubugwaneza n’uguca bugufi bakira ababashizwe imbere canke hejuru y’abandi. Ni barindire igihe gikwiriye ntibahave bavuga ngo bambaye urusato rw’intare kandi batarayica. Yesu yagize ati umukuru muri mwebge abe umusuku wanyu. [Matayo 20:26]
2 – Ubuzimire: Hariho inyigisho nyinshi zitandukanya abantu. Bavuga ngo aba naka bakorera satani, abantu bose bategerezwa kwizera ibi vyacu atari uko barahonye. Uwazimiye umuzimuruze ijambo ry’Imana mu burwaneza kuko ibitutsi n’ubucokoranyi bgambura agahuzu uwubigenderamwo bikagaragaza yuko ata kuri afise. Bibiliye Yera imwe niyo tubona ugutandukanye kuko tudasiguza Uhoraho Imana we yayihumetse.

  • Aho kwigisha Yesu Kristo ari nawe Uhoraho yatanze ivyagezwe bahatira ababumviriza ku vyagezwe bakabirutisha mwenevyo, mbere bakavuguruza Imana. Ikibumbano ntikiruta umubumvyi. [Yesaya 29:16, Abaroma 9:21]
  • Aho kwigisha ukwizera, ukwihana n’ukwezwa bigisha ivya corona, ivya ca gikoko, ibi na biriya. Umuntu wese yomenya yuko ata cago coshika kw’ihanga Imana itakirekuye naho atari Imana itwipfuriza ibibi mugabo ivyaha vyacu nivyo bidukwegera. Kandi Yesu yaratumenyesheje yuko naho tuzohabga uburozi ntaco buzotugira. [Yesaya 45:7, Zaburi 91:10, Amos 3:6, Mariko 16: 17-18]
    Mwirinde ubutumwa bgose butamamaza ugucungurwa kudaturuka ku Mwami nUmukiza wacu YESU KRISTO MESIYA niwe soko yo Kwizera n’ivyizigiro vy’abaremwe bose. [Yohana 6:35, Yohana 1:4-14]
    3- Ubusamazi: Mu birwanishwa bihambaye satani akoresha harimwo gusamaza abantu. Kandi muri abo bazana ivyo guharira gusa, gutuka abantu no kuvuguruza Bibiliya Yera, benshi babigira n’ibigirankana kugira babasamaze. Bazana ivyo bakura mu buzimire bgabo bakagomba kubibateragiramwo no kubibemeza ku nguvu kugira ngobabateshe guhishurirwa n’Imana, ugusenga no kwama imbere y’Imana. Mwirinde ibisamaza kandi mubirinde kuko ni ibicu bitagira imvura kandi ni amariba atagira amazi. Ni ibiti bitagira ivyamwa ntibikabakange [Imigani 25:14, Yuda 1:12, 2 Petero 2:17]
    Turagomba yuko abacunguwe n’amaraso ya Yesu Kristo twese tuba umwe, tugira intumbero imwe kandi dukorere hamwe mu rukundo no mu burwaneza. Abantu bagarariza akamo ko guca bugufi kugira ngo dukorere kandi dukurikire Uhoraho Imana barikwegera akarambaraye kandi bibaza ngo ni imikino. Barabaza Kora, Datani na Abiramu uko vyabagendeye. [Guharura 16:1-25]
    Naho satani abiba urwamfu rwinshi rungana gute, imbuto y’Imana iramera kandi igiye gutotahara igasare ishware isi yose. Ijambo ry’Imana ntirigenda uko rishitsa iryo ryavuze. [ Yesaya 55:11] Abikuye mu mugambi w’Imana bagateka inkubarujo zabo, utwo bigisha twose ni nk’ibicu bikubebga n’umuyaga. Ni bakumbure biyunge n’abari mu burongozi bga Mpwemu Yera kugira ngo bibonere ubgiza bg’Imana. Aka ni akamo gatewe umuntu wese, umurundi wese n’uwariwe wese.
    Mwame mwibuka yuko vuba cane Uhoraho agira ashitse isezerano mu gihugu cacu kandi amasinzi y’abanyamahanga ararindiriye ivugururwa, umuvyuro n’ikanguro rivuye mw’Ihanga Ryera ry’Imana rigizwe n’abatoranijwe. Itegure mwambare inkomezi, muce ubgenge mwitandukanye n’inyererezi kuko Uhoraho Imana agiye gutuma abiteguye. Ubutumwa bgose bg’ikanguro bubitswe mu bushobozi buri mw’IZINA RYA YESU KRISTO MESIYA, amen!

2022: Ugire umwaka wuzuye ubgenge, ugushikama n’imigisha.

IJAMBO UHORAHO IMANA ARUNGIKANYE IHANGA RYERA RYIWE KURI UYU MWAKA WA 2022

« Raba ndabatumye muri nk’intama mu mabingira hagati. N’uko rero ni mugire ubgenge nk’inzoka, mu mere nk’inuma ata karohe » [Matayo 10:16]
« Ni Jewe Uhoraho nakubariye nti shikama ushire amanga. N’uko ntutinye, nturanduke umutima, kuko Jewe Uhoraho Imana yawe ndi kumwe nawe aho uzoja hose. » [Yosuwa 1:9]
« Ugendera isi, ukayirekurira imvura, uyitungisha cane; uruzi rw’Imana rw’uzuye amazi; ni wewe wereza abantu impeke umaze kuhatunganya gutyo…. » [Zaburi 65:9-13]
Ayo majambo yo kumenya isi dutumwemwo, yo gushikama no kumenya imigisha isutswe ku gihugu cacu atubere ingazi yo kwuririrako kuri uwu mwaka.
Umwami Yesu yamamare!

Twifatanije n’ababaye bose gushima Imana iturenganishije uyu mwaka urangiye akadushitsa mu mwaka mushasha.

IHANGA RYERA RY’IMANA RYAGIYE KWIFATANYA N’ABARWARIYE MU BITARO PRINCE RÉGENT CHARLES GUHIMBAZA UMINSI MUKURU UTANGURA UMWAKA.

Kuri iri genekerezo rya 31/12/21, twashimye kwifatanya n’abarwariye mu bitaro Prince Régent Charles kugira ngo dusangire umunsi mukuru utangura umwaka wa 2022
Twabashiriye ijambo yuko Umwami wacu Yesu akiza, turasenga, dusangira imfungurwa tubasigira n’agasabune. Nawe aho uherereye ntiwigine umunsi mukuru wenyene. Wibuke abarwayi, abapfunzwe, abagendana ubumuga, abageze muzabukuru, impfuvyi n’abapfakazi. Umugenzo n’umugirwa wo kugirira neza abari mu bibazo ni akaranga k’aba-Kristo kuva kera.
Hari abavuga ngo naho bobikora ntavyo bovuga ngo kuko ijambo ry’Imana rivuga yuko ico utangishije ukuboko kw’iburyo, ukuboko kw’ibubanfu ntikubimenye [Matayo 6:3] canke iyo usenga uje haruguru mu cumba mu bgihisho ntuje mu mayira abiri[ Matayo 6:5-8]. Izo ni inyigisho Umwami wacu Yesu Kristo yigishije kugira ngo abantu ntibabe nk’indyadya, abafarisayo bavuga ibintu kumunwa canke bakoze ikintu bakagikora kugira ngo abantu bababone. Twebwe abana b’Imana dutegerezwa kubikora kugira ngo duheshe Imana icubahiro.
Yesu Kristo ntiyabujije abizera kwigisha abandi gusenga mu kuri no mu Mpwemu. Ntiyabujije abera kwigisha abantu gutanga no gufashanya. Ubuzima bgiwe bgaranzwe no kwigisha. Ni naco gituma tumwita umwigisha wacu na bugingo n’uyu munsi. Wibuke gushima Uhoraho Imana yuko akurenganishije umwaka wa 2021 kandi umwibutse amasezerano yadusezeraniye muri uyu mwaka wa 2022 dutanguye.
Umwami Yesu Kristo Yamamare!

Imigabo wogira mu mutima wawe imbere yuko utangura umwaka wa 2022.

IMBERE YUKO UYU MWAKA WA 2021 URANGIRA WOKORA IKI?

Imbere yuko uyu mwaka wa 2021 urangira kugira ngo winjire muri 2022 wokwigira inama yico ushobora gukora ku bugingo bgawe. Hasigaye umunsi umwe gusa wa 31/12/2021.

  1. Urashobora kwirimbura aho wakoze neza n’aho wagenze nabi ugaheza ukigira umugambi wo guhindura. Ukuvavanura n’ingeso mbi. Uraba uwo wagiriye nabi ukamusaba imbabazi, ukaraba uwo ufitiye ishavu, ishari canke inzigo ukamuharira kugira ngo ube uwidegemvya utangure umwaka mushasha atabifashi.
  2. Hariho ingeso zitari nziza wohitamwo guhindura n’ivyaha wokwihanira kureka. Waruzi yuko hari ibiribga n’ibinyobga ukwiriye kureka? Ingeso nk’ububeshi, ubusambanyi, ubusuma n’ibindi vyaha vyibera mu mitima y’abantu ntibabikore kubera atakaryo ka hari gusa mugabo babigendana mu mutima. Ni ukuvyihana ku buryo naho woba uri wenyene imbere y’ivyo bitsitaza uguma uhagaze.
  3. Ukwiriye kwicara hamwe ukibuka Ivyo Uhoraho Imana yavuganye nawe ukavyiyibutsa vyose kandi ukabishimira Imana. Abantu benshi baguma babona ivyo umurwi w’abantu ariko wewe ukwiriye kuraba ivyawe n’Imana muri babiri ukivuganira nayo.
  4. Ukwiriye kurimbura ivyo ukeneye mu buzima bgawe n’ivyo uzorangura Imana igutije ubuzima. Wokora imigambi y’iterambere, ukiha ihangiro ry’ivyo ugomba gushikako, ingene uzobishikano kugira ngo umwaka wa 2022 ugitangura nawe utangure ivyo bikorwa. Kira kwezi wihe intambge wogerageza gushikako n’ingene woyishikako mu mubiri no mu Mpwemu.
  5. Ku munsi urangiza umwaka ufate umwanya wo gushimira Imana. Naho woba warakenye, warashonje, wararwaye, wararwaje, warapfushije, warabuze akazi canke hari ibindi vyakugoye; si igihe c’amarira, si igihe c’ukwidoga canke c’imyikomo mugabo ni umunsi wo gushima. Gushimira Imana yuko ukiriho, gushimira Imana yuko ufise agakiza, ugushimira Imana yuko naho hari ivyashitse mu buzima bitari vyiza yuko Imana ikigukunda. Rondera wibuke ivyo Imana yagukoreye maze ubiyishimire. Amashimwe ni urupfunguzo rw’imigisha.
    Ku vyerekeye abizera amasezerano bahawe, ni mushimire Uhoraho Imana yacu yuko agira adushitseko ivyo yadusezeraniye vyose.
    Umwami n’Umukiza wacu Yesu Kristo yamamare!

Satani ariko ararondera uburyo bgose abiwe bose boronka ikimenyetso nk’uko ab’Uhoraho Imana bose bafise Mpwemu Yera.

UMUKRISTO WESE ASABGA KUTAJANA N’IMIYAGA YOSE IHUHUTA MUGABO KWAMA ASIGUZA MPWEMU YERA AKAGENDANA N’IHANGA RYERA RY’IMANA.

Mwame muri maso kugira ntimuhendwe n’abicura iki na kiriya, abigira ba kamenyi b’ivyagezwe na cane ivyo abanyamadini. Imana yaguhaye Mpwemu Yera ngo aguhishurire ikintu cose na cane cane icokubuza kuja mw’ijuru kandi uri uwejejwe.
Bazokubgira umunsi w’amakoraniro, bazokubgira urucanco, bakubgire ivyo beretswe mugabo wame umenya yuko yuko ivyo Uhoraho Imana atari ikigereranyo mugabo yuko ari ukuri (1)yumva (2) ivuga (3) itanga ibimenyetso kandi ivyo vyose ibisubiramwo. Ukwizera si ukwemera gusukwa n’inyigisho z’abantu ahubgo ni uguhagarara kuco Uhoraho Imana yavuze caba icanditse muri Bibiliya Yera canke icarico cose Mpwemu Yera ashingira intahe.
Abantu benshi baribagira yuko ivyo bumviriza, ivyo barorera, ivyo bipfuza n’ivyo bagabirije arivyo barota.
Ubutumwa bg’Imana si amajambo y’abantu, ni ijwi rituragara rivuye mw’ijuru rikemeza uwuryumvise n’uwuryumviye wese. Mwumvirize, murorere kandi musiguze Mpwemu Yera muri vyose kugira ngo ntimujane n’imiyaga yose.

Uhoraho Imana yaduhishuriye amabanga ahambaye mu gihe twari mu mashimwe y’ababarijwe.

IVYAVUYE KU MUSOZI W’AMASENGESHO KUWA 28-12-21
Mugihe dufise umunezero wa beneData bakiriye agakiza, bakihana ivyaha vyabo bakabatizwa twebge twari mu mashime. Twariko turahamagara Imana ku gicaniro c’Ihanga Ryera ry’Imana nkuko dusanzwe tubikora kuri uyumusi w’igenekerezo rya 28/12/2021, Uhoraho Imana yururutse aganira natwe ibitari bike kandi yabicishije mu bavugishwa n’Imana batandukanye. Yatubarira yuko ivyo yasezeraniye Ihanga Ryera yirobanuriye agira abishitse. Uhoraho ati: “Ni mugume mutekanye kuko ndiko ndagenzura igikorwa natanguye kandi ata nahamwe nimiriwe gushika. Hariho abantu benshi bansenga mu busa kuko basengana ivyaha n’uburyarya. Umwampi nateguye ugiye kurasa mu ngoro y’ubgami bgabo vuba”. Twahavuye duhabga amajambo ari muri [ABIFILIPI 4:1-9] Twasabge kuguma twiyeza kandi dusenga urudaca.
“1Nuko rero, abo nkunda mporanira igishika, mur’ umunezero wanje n’igitsibo nambaye, muhagarare mushikamye murtyo muri mu Mwami wacu, abo nkunda.
2 Ndahanura Ewodiya, ndahanura na Sintike, ngo bahurize imitima mu Mwami wacu. 3 Kandi nawe, ndakwinginga, uwo dufatanije igikorwa vy’ukuri, wame ufasha abo bagore, kuko barwananye nanje mu kurwanira ubutumwa bgiza, bo na Kilementi n’abandi bafatanya nanje, amazina yabo yanditswe mu gitabo c’ubugingo.
4 c Mwame munezererwa mu Mwami wacu imisi yose; ndabivuze ubugira kabiri: ni munezerwe. 5 Ubugwaneza bganyu bumenywe n’abantu bose; Umwami wacu ari hafi. 6 Ntimugire ico mwiganyira, ariko muri vyose ivyo mugomba bimenyeshwe Imana, mu gusenga no mu kwinginga bifatanije no gukenguruka. 7 Maz’ amahoro y’Imana aruta uko yomenywa n’umuntu wese, azoshibamira imitima yanyu n’ivyiyumviro vyanyu muri Kristo Yesu.
8 Ibisigaye bene Data, ivy’ ukuri vyose, ivyo kwubahwa vyose, ibigororotse vyose, ibitanduye vyose, ivy’ igikundiro vyose, ibishimwa vyose, ni haba harih’ ingeso nziza, ni haba hariho gushimwa, abe ari vyo mwiyumvira. 9 Ivyo mwize, ivyo mwakiriye, ivyo mwumvise, ivyo mwambonanye, abe ari vyo mukora: ni ho Imana Nyen’ amahoro izobana namwe.”
Umwami Yesu Kristo yamamare!

Wame wibuka kuririmba ishimwe ry’Uhoraho muri vyose.

WAME WIBUKA KURIRIMBA UBGIZA BG’UHORAHO IMANA MURI VYOSE.

Kenshi na kenshi iyo turavye hirya no hino tubona ibibi gusa. Uriko urumviriza amakuru y’irya nino canke usoma amakuru atandukanye, ni ibibi gusa bivurya irya n’ino. Ariko muri vyose wamane amashimwe.
Abavugabutumwa batandukanye n’abahanuzi bo hirya no hino bose bavuga ibibi bigiye gushika ahantu hose kw’isi. Ariko wese uze wamane amashimwe mu kanwa kawe.
Uko biri kwose wame wibuka kuririmba ishimwe ry’Uhoraho Imana ibihe vyose. Ushime naho woba waraye ubusa, naho woba urwaye canke urwaje, naho woba uri mu ntambara canke ibindi bihe bitoroshe wibuke ushime Imana.
Umukozi w’Imana Yobu yatubereye akarorero aho atigeze ashaya k’Uhoraho Imana yiwe. [Job 1:22]
Vyoshika abantu bagahimbaza umwaka mushasha bari mu mbarira n’ikigandaro ariko ntibikazane ukwidodombera Uhoraho Imana. Ni ukwibuka kwama tuyishima muri vyose. [Zaburi 95:1-5]
Mu gihe wo kwumva mu mutima wawe ata ndirimbo ihadudubiriza, tora igitabo c’indirimbo zo guhimbaza Imana. Mu gihe utumva indirimbo yo mu gitabo igukora ku mutima, soma kandi uririmbe amazaburi wongereko ama kolasi. Mwene ubu butumwa ariyizi kandi arabutahura.
Umwami Yesu Kristo yamamare!

Kuja mu bikorane mpuzamashengero (oeucumeisme) ni uguhumana ntimukifatanye nabo.

NTA MUNTU N’UMWE YIZERA YESU KRISTO YAMUBEREYE UMWAMI N’UMUKIZA W’UBUGINGO BGIWE YOJA MU BIKORANE MPUZAMASHENGERO KUKO NI UGUHUMANA.

Mwarigishijwe, mwarabariwe kandi mwarahishuriwe yuko ata muntu n’umwe yakijijwe vy’ukuri yokwisukiranya n’abatizera Yesu Kristo. Hariho abamutwara kw’izina gusa mugabo batamufise kuko badakurikiza ivyanditswe vyera babivuga ku munwa gusa. Hari uwo Kristo yababereye Umwami n’Umukiza w’ubugingo bgiwe yoja mu bikorane, amasengesho canke kwifatanya mu mirimo n’abo biyita mpuzamashengero (oeucumenism.) Ni ikizira kuko ni imigenzo gus a nta Mana ihegerara.
Mu gihugu c’Uburundi haratunganywa cane cane ibikorane vy’abanyapolitique bahamagarira amasengesho n’ibikorane mpuzamashengero yose kuja ku bibiga vy’umupiri kwigishwa n’intakebga. Umuntu atazi ukuri yokwigisha iki atari ukuguteragiramwo ubumara, ibinyoma no kugusubiza inyuma! Mu nyonga z’Imana ni igihumaya kandi ni ubuhanuzi bgeruye. Ibi tubivuze mu buryo bgeruye kuko hariho inshirasoni, ababeshi n’abagumutsi babivuga ukundi mu mvugo ndenzarugero kugira ngo bankishe abantu ibikorwa vya leta vyose kuko badashobora gutandukanya ivyo impwemu n’ivyo umubiri. Ukwifatanya na malaya w’agahebuza (oeucuminisme) ni uguhumana. Ntukwegwe no kuboneka mu gihugu, ureke Imana abe ariyo igushira hejuru.
Ukwiriye kwubaha abaganza muvyo bagutegetse vyose kiretse igihe baguhamagarira gukora ibiteye kubiri n’amabgirizwa y’Uhoraho Imana. Bigisha ngo ni amahoro kubera bose bakoraniye kunywa wino irimwo umwambiro. Umwami Yesu yaratugabishije ati :

  • « Ntimwibaze yuko naje kuzana amahoro kw’isi namba, ahubgo naje gutandukanya abizera ukuri n’abizera ibinyoma. » [Luka 12 :51]
  • « Ntimwibaze yuko naje kurungika amahoro kw’isi, ahubgo nabarungikiye inkota. Ijambo ry’Imana » [Matayo 10 :34]
  • « Kandi muzokwankwa n’abantu bose kubera izina ryanje, mugabo uwuzokwihangana gushika kw’iherezo azokizwa. » [Mariko 21 :17]
    Mwirinde ababahamagarira mu bikorara mpuzamashengero, aho abatazi ukuri aribo bafata ijambo ngo babigishe ; aho abatakiriye agakiza k’ukuri aribo bitwa amazina y’ivyubahiro bakabegeranya ngo ni muze mwumve ubutumwa bg’amahoro. Habgirwa uwumvakandi herekwa uwubona.
    Umwami Yesu Kristo yamamare !