Mugire ubgenge mwirinde abasuma bo ku mbuga ngurukana majambo nka whatsapp, facebook..,

🔴 « Bambika ubusa abakenyezi bakaca babatera ubwoba kugira babibe amahera ».

Intahe y’umwe mu banyororo mu Burundi.

Inyuma y’inkuru twabahaye y’abasuma biba abantu baciye ku mbuga ngurukanabumenyi, bakiyita amazina y’abategetsi n’abandi bazwi, hari umunyororo yatwandikiye kugira aduhe intahe y’ivyo azi uko bikorwa. Uyu muntu yemeza ko ubwo busuma bukorwa canecane n’abanyororo mu mabohero akomakomeye, ko bakarira cane abakenyezi n’abigeme, kandi ko babikorana ari abantu benshi (en réseau).

🔴 Ubusuma bukorwa n’abanyororo

« Amahoro. Ku nkuru y’ubusuma bubera ku matelefone hamwe n’abiyitirira abantu, nagira ndabahe umuco. Vy’ukuri ababikora bari mu mabohero makurumakuru (prison centrale), birateye isoni. Bariba amahera kugera ku kanyuma. Jewe nanje ndapfunzwe kandi simbona icokorwa co kubihagarika atari kubimenyesha abantu benshi bashoboka. Canecane haribwa abakobwa n’abamama kandi ku rugero runini cane.

Abo basuma bafise ubuhinga bukomeye cane. Bafise amafoto y’imipaka itandukanye, bakaboneka bari mu mamodoka, mu maduka, mu ma company akomeye kugira bemeze abantu ko ivyo vyose ari ivyabo kandi ko bavuga ukuri. Bakoresha amanomero menshi ya telefone. Kuri WhatsApp ubasangana amanomero yo hanze, batuma uwuri hanze akabagurira carte sim, hanyuma bagishira iyo nomero muri WhatsApp, uwo hanze akabarungikira code, bikaba biraheze. Ariko hageze kubarungikira amahera, bakoresha inomero ndundi za ecocash na lumicash.

Hari naho bahenda abantu, canecane abakenyezi, ko bariko babugururira ama comptes mu mabanki ariko babikora ku buryo amahera yose aca aja kuri ecocash na lumicash. Ibanki bakorerako cane ni KCB kubera batiba abarundi gusa, bariba n’abari mu bindi bihugu nka Kenya, Tanzania na Congo. Barakoresha kandi na M-Pesa kugira bibe abari muri Kenya.

Bakorana mu runani rukomeye cane. Umwe arakubwira ko arungitse amahera, uwundi akigira umukozi wa banki, canke uwundi akigira umushoferi. Umwe arigira Olivier Buyoya, uwundi akigira uwo bakorana mu bushikiranganji bw’imigenderanire, umwe arigira Denise Nkurunziza uwundi akigira uwo bakorana ajejwe gukora dosiye y’abarondera akazi, umwe arigira Angeline Ndayubaha uwundi akigira uwujejwe kurungika imfashanyo no kwakira amahera ya dosiye, umwe arigira uwuriko atanga akazi muri Zambia uwundi akaba uwakira amahera y’abashaka kuja gukorayo, gutyo gutyo. Ikibanza cose bakubwiye baba bafise amafoto y’umuntu agihagazemwo.

Barashoboye kwigira abakozi ba Leta bo mu bisata bitandukanye, ugasanga ni abakozi ba OBR, abakozi ba PAFE, ni abapolisi, ni ba porokirere, ni ba buramatari, ni abakozi bo mu biro vy’Umukuru w’igihugu, kandi bagashobora no gutanga impapuro zijanye n’ubwo buzi bavuga. »

🔴 Abakenyezi barabangamiwe cane.

« Umurwi ubangamiwe cane ni abigeme n’abamama. Aha wohimiriza abakobwa babona abasore babasaba ubugenzi kuri Facebook, hanyuma bakaca babasaba WhatsApp, bahagabire cane. WhatsApp z’aba basuma usanga ari izo mu bihugu bitandukanye kandi biryamiye mw’ibohero mu Mpimba, i Ngozi, mu Ruyigi, i Gitega, i Muyinga. Umukobwa baramuresha, bakanigira abantu bakijijwe canke bubaha Imana, bakumurungikira amafoto meza y’abagabo batunze, nawe akaja narwo ngo aronse umugabo. Ubucuti buragera kure kugeza aho mupanga imanza zo gukwa n’ubugeni. Bakubonye ufise amahera menshi, nk’uwuri muri Omani canke Arabia Saoudite, baraguteza umutwe wo kugura ikibanza co kwubaka, canke guheraheza inzu yanyu y’ubugeni, baraguhenda bakwugururiza compte muri banki ariko amahera akaja muri telefone zabo. Kubera basanzwe bakorana ari urunani runini, baraguhenda ngo uriko uvugana n’imiryango yabo, bakaguha abo bita abavyeyi n’abavukanyi babo, ukiyumva ukunzwe n’umuryango wose.

Umutego ukomeye abakenyezi n’abigeme barwamwo ni uwo kubarungikira amafoto n’ama vidéo bari gusa. Bashiki bacu barata impuzu, bakarungika ubwambure bwabo, bikarangira bibwe udufaranga twabo. Ivyo umaze kubikora baba bagufise neza kuko n’igihe wobagundura ko bakubeshe baca bagutera ubwoba ko bazoshira ahabona amafoto yawe na video zawe uri amenya. Mbere uwo mukobwa canke uwo mugore arobongera n’ayandi mahera kubera iryo terabwoba, akayabaha asaba n’imbabazi. 90% y’abibwa ni abakenyezi n’abigeme kandi ntibigera babivuga, bapfana isoni kubera ya mafoto n’ama vidéo. Aha mu mabohero hariho abagabo batunze amafoto n’amavideo y’abarundikazi bari gusa batagira uko bangana, ugasanga bariko barazerekana bitwengera. »

Iyo ari abakobwa bari mu Burundi, abasuma babahenda ko ari abarwizatunga bakorera Uganda, Kenya canke Sudani. Barabaresha bakagera aho bategura urubanza rwo gukwa. Aho bababwira ko baje ari batanu, hamwe bakavuga ko banazanye ibidandazwa mu Burundi. Bageze i Kobero baravuga ko imodoka ibapfanye kandi ko ata mafaranga y’amarundi bafise, bagasaba umukobwa kubarungikira amarundi ngo bakoreshe imodoka canke barihe ihoteri, canke barihe douane. Aho hose umukobwa imyiteguro y’urubanza iba igeze kure, amafaranga nayo aba azi ko atari ikibazo bashika bayariha. Amaze kubarungikira bakabona ko ataco asigaranye baca bamubloka ntasubira kubatora. »

« Umutego ukomeye nabonye ugondoza abigeme benshi ni uwo kubarungikira amahera biciye mu kubugururiza compte muri banki. Umukobwa bamuhenda ko bari hanze, canecane muri Kenya, bakamubwira ko baza gucisha muri KCB, ariko ko hakenerwa amahera yo kwuguruza compte. Aho rero haba hariho uwundi yiyise umukozi wa banki ariko arafasha kwugurura compte. Umukobwa bamusaba kurungika kuri lumicash amafaranga yo kwuguruza compte. Bamubwira ngo : genda ku mukozi wa Lumicash, umubwire arungike amahera, ngo minota ibiri tuca tugushirirako amahera kandi aca agushikira. Kenshi bagusaba igiharuro kidahera, nka 45.857, 4467 kugira wizere nyene ko ari ibintu vya banki. Urungitse barashobora kugusaba ayo wongerako ngo compte yugurutse gushika kuri 90% kandi ugasanga abantu baravyemeye. Vyose biheze, ntusubira kubatora. »

🔴 Abakora ivyo bintu mu mabohero barazwi

« Ibi bintu ni ibara, benshi turabibona tukumigwa kubera ataco turi bugire. Ababikora binjiza amafaranga menshi cane ku buryo bataciyumvira n’ugutaha.
Ubu hariho ababishiramwo umutahe, bakagura telefone Android nyinshi baha abakozi babo. Ayo bivye baca bayagabura n’umukozi. Biragera naho bifatanya n’abo bivye bari hanze. Aho kwishura uwo bivye, bakaca bamusaba ko bakorana kugira bibe abandi. Ni akamaramaza. Jewe aho ndi, abo basuma barariha abaserukira abanyororo kugira igikorwa cabo c’ubusuma kibandanye ata nkomanzi. Nukuri simbona ingene ivyo bintu vyoshobora gutuzwa. »

🔴 Impanuro

  1. Bakenyezi, bigeme, mwirinde rwose abo bantu babasaba amafoto na video muri gusa. Uwo ubihaye ashobora kuzogukoresha ico ashatse imyaka myinshi cane. Uracari muto, mu myaka 20 ushobora kuba umutegetsi akomeye, Ivyo wamuhaye azobigarukana ubure iyo ukwirwa. Nihagera ko wubaka, ntuzi ico azobikoza. Mureke kwizera abo mutazi, mukabaha ivyo mudashobora kugarura.
  2. Bagenzi, mukanure, nta muntu murazinanye, yimirije kukurondera ngo aguhe akazi n’ingene gakenye, ngo akurungikire ibidandazwa n’ingene ubuhemu bugwiriye muri kino gihe, ngo aguhe visa. Nimureke guhendwa.

Ikivume ni nde: Mugenzi wibaza yuko uhagaze ni wiyubare!

UMUNTU WESE AZI YUKO ATWAYE AGAKIZA YIYUBARE CANE KUKO SATANI NTAWE AGERA UMUTWE.

Uwibaza yuko ahagaze yiyubare cane kuko satani yagazwe. [1Abikorinto 10:12-13]. Kuvyerekeye ibigeragezo tumenye yuko atacotugerageza kiza kirengeye ukwihangana kwacu.
Naho satani yakororewe ikuzimu mwibuke yuko yama ariko ariha inkumbi hano kw’isi no mu kirere ngaho hejuru akoresheje imyuka y’abadayimoni. [Abayefeso 6:12]
Satani atageze umutwe Umwami wacu Yesu Kristo, akaja kumugerageza kandi azi yuko ari Imana yihinduye umuntu bitayeko yaramaze iminsi 40 mu bugaragwa atarya atanywa ariko arasenga gusa. [Matayo 4:1-11] Satani arashir’isoni, arenyaguza kandi arubahuka.
N’uyu munsi ni wa wundi, ububisha ni bga bundi satani nawe ntahindura ubugambanyi.

  • Muri Édéni yihinduye inzoka kugira ngo asuke umwana w’umuntu mu caha kandi yarabikoze biramushobokera. [Itanguriro 3:4] none gushika n’ubu umuvumo uracari mw’isi.
  • Mu bugaragwa yihinduye impwemu y’ubgenge maze asuka Kora, Datani na Abiramu maze abo bose bapfa rubi n’imiryango yabo isi irabamira uko ari 250 kuko bagararije intumwa y’Imana Mose [Guharura 16:1-40]
  • Yagiye ariha inkumbi mu bihe bitandukanye mw’Ihanga ry’Imana no muyandi mahanga nk’igihe c’isodoma na Gomora, igihe ca Nowa, i Niniwe, igihe ca Naniya na Safira n’ibindi bihe.
  • N’uyu munsi satani ahagurutsa ikivume. No mu Burundi biriho vyemera kurogota ku Mana ngo « YESU KRISTO NI… » ijambo ntashobora kwubahuka kwandika kuko umutima utonkundira.
    Ijambo ry’Imana ryanditse muri Bibiliya Yera riratubarira ivyo ikivume:[1Abikorinto 12:3] « Kuko nta n’umwe yovuga yuko Kristo ari umukiza atabivugishikwe na Mpwemu w’Imana kandi ntawovuga ngo Kristo n’ikivume atari impwemu ihumanye yo nyene ». Ico kivume kiri mw’ihanga ry’Abarundi n’iyo kiri mw’ibohero rikuru kirubahuka kikazimiza abantu mukwikwegerako abahumye amaso nabo bagakubagurwa n’iyo mpwemu ya satani yo kwama irwanya Imana n’abana bayo. Mwibuke gusengera abameze batyo.
    UHAGAZE YIYUBARE NTAGWE MURI KAMEREMERE KIWE CANKE NGO ATWARWE N’IZO MPWEMU ZIYERERA MU GIHUGU CACU.
    Umwami Yesu yamamare!

Kwamana umutima ugororokera Imana nikwo kuba umwana w’Imana.

WAME UZIRIKANA IJAMBO RY’IMANA WIRINDA KURISUKIRANYA N’IVYIYUMVIRO VY’ABANTU

Abantu b’ubu bakubarira yuko bakorera Imana mugabo bakiganzwa na kameremere kabo batahindutse vy’ukuri ngo bacike abana b’Isumba vyose. Ivyo bigatuma hariho abibaza yuko gukizwa no kudakizwa arico kimwe.
Imigenzo mibi iri mu bantu badakijijwe unayisanga mu madini no mashengero, ukayisanga mu mitima y’abantu bitirirwa kukorera Imana bigatuma bose bama mu marira n’amaganya; igihugu kikama muruhagarara kuko imigisha ihaca irengana abanyakibi akaba aribo bayisahuranwa.
Abera b’Imana, Ishengero rya Yesu Kristo ritegerezwa kwerekana ubudasa mu kwezwa no gukizwa neza kugira ngo babe Ihanga Ryera ry’Imana koko.
Kugira ngo abahisemwo inzira yo kuba abana b’Imana ntibase n’abandi bategerezwa guhinduka batigana abakizwa b’ibi bihe mugabo bagera ikirenge muca Yesu Kristo. Kugira ngo umuntu abishobore ategerezwa kwama yihererana n’Imana mu gusenga iminsi yose, asoma ijambo ry’Imana kandi arishira mu ngiro.
Twese duhinduke kugira ngo tube abagororotsi kuko gutungana biratandukanye n’uburyarya.
Umwami Yesu yamamare!

Mumenye yuko dufise ubgenge bgo mw’ijuru twongera ku bgenge bgo mw’isi.

MWIGIRE KU MYIBUTSA Y’IKIRUNDI KUGIRA NGO MWIGE KWIBANGA KURIJAJARA NO KWAMANA AMAKENGA NK’ABANA B’IMANA
[Matayo 10:16-18]

IMYIBUTSA Y’IKIRUNDI:
1.Agasozi kabaye indahiro ntikaba indagiro.
2.Agakono katetse uburozi ntikozwa umusi umwe.
3.Uwuhenzwe n’agahengwe acana inkinzo.
4.Ugwangara rw’umwungere ruhaza imfyisi.
5.Ikigutwaye umutima ni co kigutwara agatwe.
6.Iyigendana na nyina ntibura aho iyonkera.
7.Inkware y’ikijuju itebura n’umuhigi.
8.Impfizi y’icayaye irisha ku macuniro.
9.Akavyino k’igisiga gakebura inkoko.
10.Imende yarihuse ihusha umwobo.
11.Ugaburira intahaga igahaga ikumize.
12.Ibihengeri muruhongore bitera imfyisi amero.
13.inkumi itazi ikizoba itwenga intama iriko iravyara
14.uhambara cane ugahambwa kare
15 umusozi wanyereye ntiwuma
16 wibagira icakwirukangije ugaha indaro imfyisi mu ntama.

17.Igikona Cumvira Umunyu mu mbeba
18.Imfyisi Ihera Amenyo ntihera Amero

  1. Akana k’ubwenge kumvira Mu nduru
    20.Mu gihe c’umuyaga ni ho umenya amababi yari afashe ku giti.
  2. Agatu gatekeye amahwa karimena
    22.igikumi kikubenze ugitega riguye
  3. Uwimizimu itaracira musi y’urugo yigira ngo azi guterekera
    24.Akana k’ubwenge rirenga kaneye rimwe
    25.Inzoka yinjiye mu Mubindii Baramenana
    26.Umuti w’umusazi n’ubuhiri
    27.Inkoko muguhona zicudika hamw nibisiga
    28.uwutazi ikizira yamura ikizinu camereye mumbari
  4. Ingoma yagukanze irahuhuma ugahunga
  5. Umuco uva ibukuru ugashwara hose.
  6. Igiti gishashaye kwama cubaha imizi
  7. Ntarataze wa ntarataze yaburanye ruvyironza ngo numwaba wase
  8. Akabande kabaye imanga ntikaba indagiro
    34.agasaho katekeye itabi ntigahera imvunji
  9. Ubwato bwitangiye imbere bukira umukuba
    36.Igiti kirakurira mubabaji kinaga banaga, banaga kinaga

Imana ibahe ubgenge bgo kugendana n’abatizera, kugendana n’abigira abakunzi b’Imana kandi ari indyadya hamwe no kumenya uko wifata nk’Umu-Kristo kuko twarungitswe gukorera mu mabingira ngo tugendane ubgenge n’amakenga nk’inzoka Matayo 10:16-18.

Abari ku misozi ni mwururuke Uhoraho yumvise ugusenga kwanyu.

TWESE HAMWE DUSHIME UHORAHO IMANA YUKO YUMVISE UGUSENGA KWACU

Ihanga ry’Abera rirakwije imisi indwi riri mu masengesho y’urutavanako. Twasengeye abazimiye bagakorana ivyaha imirimo y’Imana. Twaradomyeko urutoke ivyo vyaha. Twarasengeye kandi amasezerano yacu, twongera dusengera imitwaro itandukanye. Uhoraho yatwishuye ati:”Ugusenga kwanyu nakwumvise, abari kumisozi ni mwururuke. Kuri iyo ndwi mugiye kwumva amatangazo”
Umwami wacu Yesu Kristo ni yamamare, Amen!

Uburundi buri mu mbobane kuko uburezi bukorera mu gihombo

Imana yo mw’ijuru,

Jewe ubwanwa burafuka umunwa iyo numvise ko iyo nyifato yo mu mashure mu Burundi nubu itarahinduka.

Ingorane ziri kubiri.
Iyambere ni ugutanga amanota make (50% umunyeshule aba atomboye). Biragufiriza cane abanyeshure bashaka kubandanya amashule mu bindi bihugu. Biraha isura mbi igihugu.
Iyakabiri ni ukuyobeza. Ugasanga umwigisha ngo yamenyesheje abanyeshule 50% canke bari munsi. Abayobozi bakanuma, ubushikiranganji bukanuma, abavyeyi bakanuma🤷🏾.

Hagahava haza ivyo gusigara. Hari umukobwa twigana yasigaye gatandatu imbere yo gutora ikibazo c’uwa 6🥱Ikibabaje gose, ntiyavuka no muri ako karere. Nukuvuga ko Leta yahomvye, abavyeyi n’umunyeshule ukwo nyene, TUTIBAGIYE ABANA 5 Babuze amahirwe yo kwiga kubera uwo mukobwa yagariye kuri iyo ntebe🤷🏾.

Ivyo vyose mvuze biba kuva mw’ishure shingiro gushika muri kaminuza.
Ariko hari AKAMARAMAZA muri kaminuza, nuko ni kubona umunyeshure ayoberwa kubera icirwa kimwe hama yasubiramwo agasubiramwo n’ivyo yamenye. Yategerezwa gusubiramwo ico yananiwe bakongerako ivyirwa vy’umwaka ukurikira.

Muri make, mu BDI turakwiye guhindura ingendo tugasaba umwigisha ko yogerageza abo yigisha bose bakamenya.

RN Niba Leta ikoresha BIF imiriyaridi ku mwaka mu ndero, iyo hamenye abanyeshure 60% bisigura ko BIF miliyoni 600 zabaye impfagusa.

Niko ndavyibaza ariko nshobora kwihenda kuko sindi umuhinga. » ukuri n’uko ubutegetsi bgacu butaratahuri imizi y’ingorane bufise.

Adolph Ntibasharira ati ukora iciza ukagisanga imbere.

“Kuvyiza ukora uze wongereko agakiza uhererwa ubuntu na Yesu Kristo”

👴🏽 Nitwa Adolphe Ntibasharira. Nkina amasinema. Ni jewe nandika igikino « Murikira Ukuri ». Ni na jewe natoye amazina y’Abaseruko n’Abarengero

🇧🇮 Kuva kera, namye ngerageza uko bishoboka kwose kurwanya icitwa amacakubiri.

🙅🏽‍♂️ Ubwa mbere na mbere, hari hakiri ubugererwa ku ntwaro ya Bagaza. Data arampamagara ngo nje i Gihinga muri sentare kuvuga ko itongo ririmwo abo twita abagererwa (b’abahutu) ari iryanje data yambikiye. Intahe ishashe, nashize aho adashaka, ndabwira sentare ko abo bantu navutse bahari, ko jewe iryo tongo mbona ko ari iryabo. Data yavuye aho amvuma kugera i Mwaro, wa mupfakazi nawe ampezagira ko ndamurokoye. Ubu abiwe tubanye neza cane 🫂

🎶 Ikindi gihe, hari mu 1978, aho nashika mu bushikiranganji bw’urwaruka n’imico kama. Nashitseyo kubera igikino canje nanditse, “Uwapfuye ntaco yabonye” cari gihejeje kuba ica mbere ku rwego rw’igihugu. Ni uko baca barangomwa bampa gutwara igisata c’imvyino kama (Chef de Service Folklore National). Ico gihe, hari ukwinubana hagati y’abanyakaranga natwara. Abahutu bavuza amakembe, abatutsi bakavuga ibicuba, amazina n’inanga, abatwa nabo bakavuza imiduri. Igiteramo giheze, abatwa banywera ukwabo kuko abandi babanena.

😃 Ico nakoze, umusi umwe, twagize umusi mukuru mu nyuma tugenda mu gatutu ahitwa kuri Paguidas. Ndahashitse natanze itegeko nti : “Ubu rero, mwese muranywa ariko muhanahana icupa rimwe hanyuma mukure ivyo kwinubana ng’aha. Mwebwe muvugije ivyuma vyanyu havukamwo ivyiza, ubuki bw’amatwi, wohora urumviriza, hanyuma mwinubane ? Kurya umuziki uryoha muri kumwe, niko n’igihugu kidukeneye twese mu butandukane bwacu” 🧏🏼‍♂️

🤜🏼🤛🏾 Mvuye aho, kuva mu 1981-1991, naciye ngenwa kuba musitanteri, nikurikiranya gutwara Jene (ubu yitwa Kabarore), Gahombo na Matongo. Muri ayo mabanga sinorohewe. Hari icuka kibi ngo aba Palipehutu bazotera, nanje nagerageza kuguma namama ndwanya ko abanyagihugu bacanamwo. Ni uko naratunganije urukino rwa Volley ball i Bandaga hakina abahutu n’abatutsi. Buramatari avyumvise yarumiwe arankeza ko ndi umugabo 👏🏼

🛌🏻 Ndibuka mu nama rukokoma (congrès extra-ordinaire) yabereye i Gatara, ni je naryamika abantu mu buraro bw’ishure. Nafata umuhutu nkamuryamikana n’umututsi bakurikirana, nkababwira nti uja kurwara ngo ni uko yararanye n’uwo badasangiye ubwoko aje kuza ndamuvuze.

👮🏽 Ndi muri ayo mabanga nyene, kubera ko abantanguriye batanga ubuzi ku bwoko kandi bagaha abatama ngo ni bo bazi kurarira, ndiko ndinjiza abapolisi bakorera komine naciye mpindura umukenyuro. Nashaka abantu babangutse, umwe umutumye umusuma amufata. Ntaravye ubwoko, natumiye zina musore wese. Abatoye ikibazo bararonse akazi hatisunzwe ubwoko.

⏪ Mu 1993, inyuma y’aho abanyeshure batuririwe kw’ibubu mu Kibimba, hari abatutsi bari baje kwica ba bagererwa tubana. Naciye nja kubwira ba babanyi bazana ibintu vyabo vyose iwanje, mu nyuma duca turara irondo hamwe. Nko mu gicugu niho twaja tubona amatoroshi baza, nca ndasohoka ndasemerera mvuga nti : « Uwukomereka canke uwupfa ntimumbaze. » Aho nta n’inkoni nagira. Nja numva ngo : « Turagiye ariko abo ubitse ntuzi ko ubitse ikara mu gashambara. » Mba mbujije ibara kugwa.

🤷🏽‍♂️ Mu bikorwa vyose nakoze no mu nyifato nagiye ndagira zobera akarorero abandi, sinorohewe na gato. Ariko jeho nahakuye ivyiza vyinshi kuko ba bagererwa natabara ubu ni bo bandabira itongo ry’umuryango, igitoke ceze baragica bakangemurira, inka ni bo baziragira kandi ni bo bazikama, abana babo ni jewe ndabasohora iyo bubatse izabo. Twarabaye umuryango umwe.

Imana ikuje imbere.

Ivyaha 10 bituma Abera baba ibiburirane.

TUBANDANYE GUSENGA DUKOBEJE KANDI TWEJEJWE KUKO TUGIRA DUSHEKE KU MASEZERANO.

Ijambo ukwezwa rirakunda kuyobera abantu batari bake kuko iyo umuntu yubaha ivyagezwe icumi Uhoraho yahaye Ihanga ryiwe igihe ca Mose bibaza yuko baba bakwije vyose.
Ikibazo gihambaye abantu twihendako n’uko hambavu y’ivyo vyagezwe icumi dufise ayandi mabgirizwa icumi nyene umuntu wese ategerezwa kwinengesera kugira ngo abe uwejejwe. Kugira ngo Uhoraho Imana agushitse ku masezerano yawe utegerezwa ku musenga wejejwe. Ngivyo rero ivyaha icumi bibuza abizera kugororokera Uhoraho Imana bigatuma baguma bayerera mu bugaragwa ntibambuke Yorodani. Mubisome kuri ico canditse, mwihane kugira ngo Imana Isumba Vyose yumve ugusenga kwayu. Woba hari ikibazo ufise? Twandikire mu mbari duheze dutange insiguro zihagije. Uhejeje kubona aho utsindwa ukihana, uheze utumbereze isengesho ryawe kuri bimwe wasezeraniwe kugira ngo amasengesho yacu twese anyiganyize ibisika vy’Iyeriko.

IVYAHA 10 BITWARA ABERA MURI GIHONOMU

  1. Kutumvira ijwi rya Mpwemu Yera [Abaroma 8:14]
  2. Kudahanurwa no kutumvira uburongozi [Abaroma 13:1]
  3. Kutavugisha ukuri no gukoresha uburyarya [Abayefeso 4:2]
  4. Gushavura rikakurengerako [Abayefeso 4:2]
  5. Kudatunganya na mugenzi wawe [Matayo 5:23-26]
  6. Kutiyeza mu mutima, mu ngeso no mu mubiri [1 Abitesalonike 5:23]
  7. Kutagirira abanda ivyo twipfuza ko botugirira [Luka 6 :31-36]
  8. Kuronderera itunga n’ivyubahiro mu gukorera Imana [Matayo 10 :8]
  9. Kutagirira imbabazi abandi no kubavuga nabi [Abayefeso 4 :30-32]
  10. Kwita Data mu mpwemu umuntu w’inyama n’amaraso [Matayo 23 :9-12]


Umwami n’Umucunguzi wacu Yesu Kristo ni yamamare, Amen!

Indwi y’amasengesho y’urutavanako 23-29/10/2022

ITANGAZO RY’IY’INDWI KUVA KUWA 23 GUSHIKA KUWA 29/10/2022: AMASENGESHO Y’AGATONDO NO KUMUGOROBA

Ishengero rya Yesu Kristo Ihanga Ryera ry’Imana riramenyeshejwe aho riri hose mu gihugu no mu mahanga muri AFRICA, CANADA, AMERIKA, ASIYA, AUSTRALIYA yuko ritumiwe n’ijuru gusenga amasengesho y’urutavanako y’indwi yose yo kuva kur’uyu wa 23 gushika kuwa 29/10/2022.
Aho bishoboka Abera bazohora bazindukira ku gicaniro canke ku rusengero gusenga iyo minsi yose mu gitondo sa kumi na zibiri imbere yuko baja ku mirimo bongere bahurire muri ivyo bibanza isaha cumi n’imwe canke cumi na zibiri bagaca bataha. Ayo masengesho ntazohora arenza isaha imwe yo kwiherana n’Uhoraho Imana mu gutazira no gusenga.
Aho bidashoboka yuko abantu bakoranira hamwe ngo basenge, umuntu wese yibuke rwa rutonde twahawe rw’igicaniro ngendanwa, no gusenga uko amasaha atatu arangiye kugira ngo twese tugume ku mugozi w’amasengesho.
Ijuru ribatangariza ibi bikurikira:

  • Abanyamadezerano mwese mumenye yuko mwinjiye mu minsi yo gukora ibitangaza kw’Uhoraho Imana. Igihe canyu ni iki.
  • Ihanga Ryera ry’Imana mugiye kwibonera kwa kuboko kw’inkomezi kw’Uhora Imana.
  • Ni mutangure gushima Uhoraho Imana yuko igiye kubashitsako amasezerano yose y’imigisha yabasezeranire.
    Umwami n’Umukiza wacu Yesu Kristo yamamare, Amen!

Ntihagire uwusukwa n’ikinyoma ca satani ku mihora y’ubu.

ABIZERA IMANA NI MUREKE KWEMERA IBINYOMA VYA SATANI KUKO NI UGUKORA IVYAHA MU BINDI.

Uhoraho aguma aburira abiwe ngo bareke kwemeranya n’amajambo yo ku mbuga ngurukanamajambo ahubgo nyabuna bagendere kuco yavuganye nabo canditswe muri Bibiliya Yera n’ico Mpwemu Yera ahishura. Imana igira iti abantu banje bishwe n’ukutamenya. [Hoseya 4:6]
Ikibabaje n’uko hari n’abakozi b’Imana bariko barakwiragiza amasanamu (Videos) y’abakuru b’ibihugu ngo batangaje intambara y’ubumara bgo kurimbura isi.
Ivyo bihuha birandura umutima abizera benshi bigatuma basenga ukutariko mu kinyoma kandi bakazorangiriza kurwa kuko baba bigishijwe ibitarivyo. Abariko barakwiragiza ico kinyoma ca satani ni babihagarike, bihane. Ayo majambo bavuga ngo yashikirijwe ntiyigeze abaho. Ikinyoma c’bikwiragizwa gihagaze aha:

  1. Video ngo ya Joe Biden umukuru w’igihugu ca Amerika. Ubgambere ijwi bakoresheje si rwiwe ni irya Obama yasubiriye kandi ntiyariko aravuga ivyo intambara ya Ukraine n’Uburusiya. Uyo munyarwanda ariko aravuga ivyo yikuriye mu mutwe wiwe.
  2. Videoy’umukuruw’igihugucaKoreyayaruguru.Amajamboavugwamugikoreyanta sano afitaniye nayo yavuzwe mu rurimi rw’ikinyarwanda. Uwo mu nyarwanda ariko arahuruza ntihagire uwuja ku mateshwa avuze.
  3. Video Putine umukuru w’igihugu c’Uburusiya ngo ariko arishura ivyo Joe Biden umukuru w’igihugu ca amerika yavuze, ni ikinyoma cambaye ubusa. Yabikuye mu ntumbero yayo yivugira mu kinyarwanda ivyiwe yigeneye.
    Uwukora ayo ma video ariko arabesha abantu. Ashobora kuba afise intumbero yo kwironderera abanywanyi benshi ku rubuga rwiwe kandi akongerako guhungabanisha ibinyoma imitima ya benshi. Turazi yuko benshi barindiriye ibimenyetso vyavuzwe vyerekana umuhero w’isi, ariko ni mutekane. [Matayo 24 :4-51] Ntihagire uwizera Yesu Kristo n’umwe aja kuri ivyo binyoma. Igihe kigeze umwe wese azobimenya kuko umugeni azoba atashe.
    SiteWeb:www.abisezerano.com Email:abisezerano@gmail.com