Umupatiri yari arongoye Paruwasi ya Kitachanga mu ntara ya Kivu ya ruguru, Etienne NSENGIYUMVA yishwe arashwe mw’ishengero, mu gihe yariko ahereza inkuka y’imisa.

Patiri Etienne NSENGIYUMVA yarashwe n’umuntu yinjiye mw’ishengero mu gihe yariko asangiza abakirisu bashasha bagitangura kwakira iryo sakaramentu, mu misa yari itegekanijwemwo kubatiza abakirisu bashasha hamwe no kuraganisha abubaka rukirisu.

Ayo makuru dufise avuga ko uwarashe Patiri Etienne NSENGIYUMVA ari umugwanyi w’umugwi wa Mai Mai Nyatura usanzwe ukora ibitero hamwe no gusahura abanyagihugu baba muri ako gace ko mu ntara ya Kivu ya ruguru.