Perezida Bashir wa Sudani, utagamburuzwa n’imyigaragambyo, yegetse iyicwa ry’abigaragambya ku ‘bacengezi’

Inzego z’umutekano zo muri Sudani zarashe imyuka iryana mu maso ku bigaragambya, mu gihe imyigaragambyo yo kwamagana Perezida Omar al-Bashir w’iki gihugu igeze mu kwezi kwayo kwa kabiri. Ku cyumweru, Perezida Bashir yongeye gusubiramo ibirego byuko « abakozi » b’amahanga n’inyeshyamba zo mu ntara ya Darfur bari kwenyegeza iyi myigaragambyo y’abatavuga rumwe na leta. 

Abategetsi bavuga ko abantu 26 ari bo bamaze kugwa muri iyi myigaragambyo, ariko imiryango iharanira uburenganzira bwa muntu ivuga ko abarenga 40 ari bo bamaze kwicwa. Iyi myigaragambyo yatangiye mu kwezi gushize kwa cumi na kabiri ari iyo kwamagana izamuka ry’igiciro cy’umugati n’icy’ibikomoka kuri peteroli, ariko ubu yahinduye isura iba iyo kugaragaza uburakari bafitiye ubutegetsi bumaze imyaka 30 burangajwe imbere na Bwana Bashir.

Mu ijambo rye ryo ku cyumweru yavugiye mu majyepfo y’umurwa mukuru Khartoum, Bwana Bashir yegetse iyicwa ry’abigaragambya ku bo yise « abacengezi ».  Amakuru avuga ko yavuze ko « hari abantu bamwe bari mu bigaragambya bari kwica abigaragambya ».

Ku cyumweru, abigaragambya babarirwa mu magana bagerageje kwerekeza ku nteko ishingamategeko ya Sudani mu mujyi wa Omdurman. Bashakaga gutanga inyandiko ikubiyemo ubusabe bwuko Perezida Bashir yegura. Mu rugendo rwabo, bateraga hejuru bati, « ubwisanzure, amahoro n’ubutabera » – amagambo agize intero yabo – ndetse bakagira bati, « hirika ku butegetsi, hirika ku butegetsi ».

Ariko polisi yabarasheho imyuka iryana mu maso byo kubatatanya, kandi amakuru avuga ko yanabirukankanye.

Ibiro ntaramakuru Reuters bitangaza ko imodoka 30 zitwaye abashinzwe umutekano bambaye imyenda y’akazi ibaranga ndetse n’abambaye imyenda isanzwe ya gisivile, ari bo boherejwe ahaberaga imyigaragambyo.  Hanavuzwe imyigaragambyo mu turere tubiri tw’i Khartoum – Burri iherereye mu burasirazuba na Bahari mu majyaruguru ya Khartoum. 

Umuganga yiciwe mu bushyamirane bwabereye i Burri ku wa gatanu.  Hari amakuru yavugaga ko hari n’umwana wishwe, ariko abigaragambya ku cyumweru bariseguye kubera icyo bise « amakuru atariyo ».

Impirimbanyi zivuga ko abasirikare ba leta ya Sudani barashe amasasu nyamasasu ndetse bagata muri yombi abigaragambya. Mu itangazo rigenewe abanyamakuru, Sarah Jackson, wungirije umukuru w’umuryango uharanira uburenganzira bwa muntu Amnesty International mu karere k’Afurika y’iburasirazuba, yegetse ku nzego zishinzwe umutekano « ubwicanyi butagira gikumira ».

Publicités