Abiciwe mu gitero co mu Ruhagarika bashinguranywe iteka

Abantu 26 bitavye Imana mu bwicanyi bwabereye ku mutumba Ruhagarika, komine Buganda, Intara ya Cibitoke, bashinguranywe iteka kur’uno wa kabiri igenekerezo rya 15 Rusama 2018. Ibirori vyitabwa n’abarongozi bo mu gihugu, muri abo harimwo umushikiranganji w’intwaro yo hagati mu gihugu Pascal BARANDAGIYE.

Ibirori vyo gushingurana iteka abo bantu 26 bishwe mw’ijoro ryo kuwa 11 rishira uwa 12 Rusama 2018, vyabereye ku mutumba Ruhagarika aho biciwe, bakaba kandi bashinguwe mu kibanza kimwe catunganijwe, hafi y’ahabereye ico gitero.

Ivyo birori vyitabwe n’abaserukira ibihugu vyabo mu gihugu c’Uburundi, nk’uwuserukira igihugu c’Ubufaransa, uwuserukira igihugu c’Ububirigi, uwuserukira igihugu ca Reta Zunze Ubumwe za Amerika, PNUD n’abandi bategetsi mu gihugu.

Ico gitero cahitanye abantu 26 abandi 7 barakomereka, cabaye mw’ijoro ryo kuwa gatanu igenekerezo rya 11 rishira kuwa gatandatu igenekerezo rya 12 Rusama 2018, nk’igihe c’isaha zine z’ijoro.

Kuva ku mukuru w’igihugu c’Uburundi, intumwa y’umunyabanga mukuru wa ONU mu Burundi, imigambwe n’amashirahamwe atandukanye, yariyamirije ubwo bwicanyi bwahitanye abanyagihugu.

Mw’itangazo umushikirizamanza kizigenza wa Republika, Sylvestre Nyandwi,yashize ahabona kur’uno wa mbere igenekerezo rya 14 Rusama 2018, yamenyesheje ko hashizweho umurwi ukora amatohoza kuri ubwo bwicanyi, ukaba wahawe ukwezi kwo gukora.

Publicités