Repubulika ya demokarasi ya Kongo yatangaje ko indwara nshya ya Ebola imaze guhitana abantu 33

Minisiteri y’ubuzima muri Repubulika ya demokarasi ya Kongo, yatangaje ko hibazwa ko abantu 33 ari bo bamaze guhitanwa n’indwara ya Ebola kuva yakwongera kwaduka muri iki gihugu mu ntangiriro y’uku kwezi kw’umunani mu ntara ya Kivu y’amajaruguru.

Ku wa gatandatu, Minisitiri w’ubuzima Oly Ilunga Kalenga yabwiye ibiro ntaramakuru AFP ko n’abantu 13 bamaze kwandura Ebola kuva yakongera kwaduka muri iki gihugu.

Dogiteri Ilunga Kalenga yongeyeho ko batatu muri 33 byibazwa ko bamaze guhitanwa na Ebola, ari abo mu iri itsinda ry’abantu 13 bari bazwi ko bamaze kuyandura.

Ku wa gatanu, Dogiteri Peter Salama ushinzwe ibikorwa by’ubutabazi bwihuse mu ishami ry’umuryango w’abibumye ryita ku buzima OMS, yabwiye abanyamakuru ko guhangana na Ebola mu « karere kibasiwe n’intambara » ka Kongo ari imwe mu ngorane zikomeye cyane OMS ihuye nazo.

Ebola yongeye kwaduka muri Kivu y’amajyaruguru hashize icyumweru kimwe OMS n’ubutegetsi bwa Kongo bishimiye ko bashoboye guhagarika indwara ya Ebola yari yadutse mu ntara ya Équateur iri mu majyaruguru ashyira uburengerazuba bw’igihugu, aho yishe abantu 33.

Minisiteri y’ubuzima muri Kongo yatangaje ko cyo kimwe na mbere, « gutanga inkingo ari uburyo bw’ibanze » igiye gukoresha mu guhangana na Ebola.

Iyi ni inshuro ya 10 Ebola igaragaye muri Kongo kuva mu mwaka wa 1976 ubwo yagaragaraga bwa mbere mu majyaruguru y’iki gihugu kikitwa Zaïre.

Ebola ni imwe mu ndwara zitinywa cyane ku isi. Bimwe mu bimenyetso byayo ni ukuva amaraso mu kanwa, mu maso no mu matwi.

Kuva mu mwaka wa 2013 kugera mu mwaka wa 2015, Ebola yibasiye ibihugu bya Guinea, Liberia na Siera Leone byo mu burengerazuba bw’Afurika, ihitana abarenga ibihumbi 11. Mu mateka y’iyi ndwara, ni bwo yari ihitanye abantu benshi cyane ku isi.

Publicités