Amasezerano y’amahoro hagati ya leta ya Centrafrique n’imitwe y’inyeshyamba

Abategetsi bavuga ko leta ya Centrafrique n’imitwe 14 y’inyeshyamba, bemeranyijwe ku masezerano y’amahoro nyuma y’ibiganiro byabereye muri Sudani.

Aya masezerano yatangajwe n’ubutumwa bwo kubungabunga amahoro muri Centrafrique bw’umuryango w’abibumbye buzwi nka Minusca, hamwe n’umuryango w’ubumwe bw’Afurika – yombi yateye inkunga ibi biganiro byabereye mu murwa mukuru Khartoum wa Sudani.

Smail Chergu, komiseri w’amahoro n’umutekano w’umuryango w’ubumwe bw’Afurika, yagize ati: « Uyu ni umunsi ukomeye kuri Repubulika ya Centrafrique no ku baturage bayo ».

Leta ya Centrafrique itegekwa na Perezida Faustin-Archange Touadera, nayo yemeje aya makuru mu butumwa yatangaje ku rubuga nkoranyambaga rwa Twitter. 

Yatangaje ko aya masezerano y’amahoro azashyirirwaho umukono mu murwa mukuru Bangui w’iki gihugu mu gihe cya vuba kitatangajwe.

Ibikubiye muri aya masezerano ntabwo birashyirwa ahagaragara, ndetse abasesenguzi bavuga ko aya masezerano y’amahoro yatangajwe ari ayo kwitondera kuko ayayabanjirije yaje kurengwaho.

Centrafrique yakomeje kurangwamo umutekano mucye kuva yabona ubwigenge mu mwaka wa 1960 yigobotoye Ubufaransa bwayikolonizaga.

Yibasiwe n’imvururu mu mwaka wa 2013 ubwo inyeshyamba zigendera ku mahame akaze y’idini ya kisilamu zo mu mutwe wa Seleka zafata ubutegetsi muri iki gihugu cyiganjemo abakristu.

Umutwe w’inyeshyamba ugizwe ahanini n’abakristu witwa anti-Balaka, wahise utangira guhangana na Seleka.

Abantu babarirwa mu bihumbi baguye muri izo mvururu, naho abarenga miliyoni bateshwa izabo bahungira mu bindi bice by’iki gihugu. Hagereranywa ko abaturage ibihumbi 570 ba Centrafrique bahungiye mu mahanga.

Publicités