SATANI N’ABADAYIMONI NIBAJUGERAGEREZA UBEREKE IVYAGEZWE VY’IMANA KIMWE KU KINDI.

Twebge nk’Aba-Kristo bashaka kugororoka, turafise ingene turwana intambara iterwa na satani n’abambari biwe. Aho duca hose, aho tubaye, aho dukorera imirimo hose, mu butegetsi, ku rusengero n’ahandi hose turahasanga ibigerazo. Woba umuhungu canke umukobga, woba umugabo canke umugore, twese twamana ibigeragezo hirya no hino kuko satani wewe ntaryama.
Nico gituma uwugomba kunesha wese yomenya ingene arwanisha ijambo ry’Imana mu mutima wiwe no mu kubaho kwa minsi yose. Ivyagezwe icumi Imana yahaye Ihanga rya isirayeri ngo rigendereko biratubera inkinzo mu bihe bimwe bimwe iyo satani aduteye ngo adushuke. Akubariye ngo ni usambane umwishura uti handitse ngo ntugasambane; akubariye ati ni wibe uti handitse ngo ntukibe; akubariye ati raba urahumiwe ntugasinzire ukamwishura uti handitse ngo wibuke kuziririza umunsi w’isabato; akugerageresheje ibigirwamana, ukuraguza n’ibindi vyose uce umwibutsa ivyagezwe ico bivuga gutyo uzotsinda. [Kuvayo 20]
Mwame mwibuka kwambara ibirwanishwa vy’umu-Kristo vyose kuko abo tunigana atarabo inyama n’amaraso gusa. Satani asusutse ngo ni ubeshe uvuge ibinyoma umunore uti namba kuko nkenye ukuri; azanye twatuntu yasutse mw’isi two guhinyika ibintu vyose asange mwambaye ukugororoka muti shwi; azanye ibiyago bisesema n’urusinziriza asange mutwaye ubutumwa bgiza bg’amahoro bga Yesu Kristo; azanye gukekeranya asange mufise ukwizera guhamye; muri vyose aho aca hose asange mufise agakiza muzi n’ijambo ry’Imana maze abure aho amenera. [Abayefeso 6:10-18]
Satani, abadayimoni n’abanyakibi bose baratsinzwe mw’ijuru. Natwe twisunze ijambo Uhoraho Imana yaduhaye tuzomutsina hano kw’isi kuko ikibanza ciwe ni mu muriro udahera.
Hanga Ryera ry’Imana mwibuke kutishushanya n’ab’isi, abanyamadini n’abadahagarara mw’ijambo ryose. Duhagarare mw’ijambo ry’Imana, satani azoduhunga. Umwami Yesu Kristo yamamare.