IVYAVUYE KU MUSOZI W’AMASENGESHO [Jeremiah 25:27-38]

27.Kand’ uz’ ubabarire, ut’ Uku ni k’Uhoraho Nyen’ ingabo agize, ni we Mana y’Abisirayeli, ati Ni munywe, muborerwe, mudahwe, mwubameho, ntimuze musubire kuvyuka ukundi, kubg’ inkota nzorungika muri mwebge.

28 Maze ni baramuka banse kwabira igikombe mu kuboko kwawe ngo banywe, uz’ uheze ubabarire, ut’ Uku ni k’Uhoraho Nyen’ ingabo agize, ati Ntimugenda mutakinyoye:

29 ko ntanguriye ku gisagara citiriwe izina ryanje kuhazana ivyago, none mwebge mwobura guhanwa? Eka ntimuzobura guhanwa na mba: kuko nzohamagara inkota ngw ize ku baba kw isi bose, ni jewe Uhoraho Nyen’ ingabo mbivuze.

30 Nuko rero, ubaburire ayo majambo yose, ubabgire, ut’ Uhoraho azokwivuga ari mw ijuru, avuge n’ijwi rirenga ar’ ahiwe hera; umukuku wiwe azowutontomera; azovuza akamo, nk’ak’ abakanya inzabibu, akavugirije ababa kw isi bose.

31 Ijwi ryavyo rizoshika no ku mpera y’isi; kuk’ Uhoraho afitaniye imiburano n’amahanga, azoburana n’abariho bose; kand’ abanyavyaha azobagaburira inkota, ni k’Uhoraho agize.

32 Uku ni k’Uhoraho Nyen’ ingabo agize, at’ Eh’ ivyago bizosimbasimba biva kw ihanga bija ku rindi, kand’ ikirura gihambaye kizozingazinga kivuye ku mpera z’isi.

33 Abishwe n’Uhoraho bazohera ku mpera y’isi bashike ku yindi, ntibazoririrwa, canke ngo begeranywe, canke ngo bahambge; bazoba nk’intabire yometse ku misozi.

34 Muboroge, mwa bungere, murire; mwitembagaze mu minyota, yemwe ba kizigenza mu mukuku: kukw igihe co kubagwa kwanyu gishitse rwose; nzobasavya, mukoroke nk’ikarabo riteye igomwe.

35 Abungere ntibazobona inzira yo guhunga, canke ba kizigenza mu mukuku ngo babone ingene bacika.

36 Umve ijwi ry’ukurira kw’abungere, n’iry’ ukuboroga kwa ba kizigenza mu mukuku! Kuk’ Uhoraho yakomvoje ubgatsi bgazo.

 37 Impongore zar’ amahoro zisigaye zumaniwe, kubg’ uburake bg’inkazi bg’Uhoraho.

38 Yahevye ahiwe nk’ukw intambge iheba ikibundo cayo; kukw igihugu cabo gihindutse akajoreza kubg’ ubukare bg’inkota itwaza igitugu, no kubg’ uburake bgiwe bg’inkazi.

Uri n’ugutwi yumve kandi atahure ivyo Mpwemu Yera ahishura. Mwibuke gusengera ubugingo bganyu, imiryango yanyu n’ishengero ariryo Hanga ry’Abera.